ގޮއިދޫ ކަރާ ދަނޑުތައް ފައްކާކުރީ ރޯދައަށް، 150 ޓަނުގެ ކަރާ ބާޒާރަށް ނެރެވޭނެ

އުތުރުގައި އެންމެ ފުޅާ ދާއިރާއެއްގައި ކަރާގެ ދަނޑުވެރިން ކުރަމުން އަންނަނީ ށ ގޮއިދޫގައި އެވެ. ކޮންމެ އަހަރެއްގެވެސް ރޯދަމަހާ ދިމާކޮށް އެރަށުގެ ދަނޑުވެރިން ވަރަށް ބޮޑަށް ތައްޔާރުވެ، ރަހަމީރު ކޮލިޓީ ކަރާ ބާޒާރަށް ނެރެ އެވެ. އެހެން އަހަރުތަކާ އެއްގޮތަށް މިއަހަރުވެސް ގޮއިދޫ ކަރާ ދަނޑުތައް ފައްކާކުރީ ރޯދަމަހަށްށެވެ.

މިއަހަރު އެރަށުގައި 190 އަށްވުރެ ގިނަ ދަނޑުގައި ކަރާ ހައްދާފައިވާއިރު އެއީ ގާތްގަނޑަކަށް 7 ލައްކައަކަފޫޓަށްވުރެ ބޮޑު ސަރަހައްދެއްކެވެ. އެހެން އަހަރުތަކާ އަޅައި ބަލާއިރު މިއީ މިހާ ބޮޑު ސަރަހައްދެއްގައި އެރަށުގައި ކަރާ ހެއްދި ފުރަތަމަ ފަހަރެވެ. މިއީވެސް މިމަސައްކަތް މިއަހަރު ފުޅާކޮށްފައިވާކަމުގެ ހެއްކެކެވެ.

ގޮއިދޫ ކައުންސިލްގެ ރައީސް އިބުރާހިމް ޝާހިދު ވިދާޅުވިގޮތުގައި މިއަހަރުގެ ރޯދަމަހު ގާތްގަނޑަށް 120-150 ޓަނާ ދެމެދުގެ ކަރާ އެރަށުން ބާޒާރަށް ނެރެވޭނެ ކަމަށެވެ. އަދި ދުވާލަކަށް އެވްރެޖްކޮށް ދެ ޓަނުގެ ކަރާ ބާޒާރަށް ނެރެވޭނެކަމަށް ޝާހިދު ވިދާޅުވި އެވެ.

މުޅި ރޯދަމަހު ގޮއިދޫ ކަރާ ބާޒާރުން ހުސްނުވެ ހުންނާނެ ކަމަށާއި ކަރާ ކިލޯއެއްގެ އަގު އުޅެނީ 18ރ އާއި 25ރ ދެމެދުގެ އަގުތަކެއްގައި ކަމަށެވެ. ޝާހިދު ވިދާޅުވީ މިހާރު މިވަގުތު އަޔަސް ތާޒާ ރަހަމީރު ކަރާ އެރަށުން ލިބޭނެ ކަމަށާއި ކަރާ ގަތުމަށް މިހާރުވެސް ސަޕްލަޔަރުން އެރަށަށް އަންނަމުންދާ ކަމަށެވެ.

ރޯދައަށް ހެއްދި ކަރާތައް ބާޒާރަށް ނެރެންފަށާފައިވާއިރު އިއްޔެވެސް ގޮއިދޫން ވަނީ ގިނަ އަދަދެއްގެ ކަރާ ކުޅުދުއްފުއްޓަށާއި މާލޭއަށް ބޭރުކޮށްފަ އެވެ. ރޯދައާ ދިމާކޮށް ކަރާ ހެއްދުމުގައި ރަށުގެ ގިނަ އަދަދެއްގެ ރައްޔިތުން ހަރަކާތްތެރިވަމުންދާއިރު ގޮއިދޫގައި ހައްދާ ކަރަޔަކީ ކޮލިޓީ މޮޅު ފޮނި ކަރަ އެކެވެ. އެކަން ސަރަހައްދުގެ ގިނަ ބަޔަކުވެސް ގަބޫލުކުރެ އެވެ.

"ގޮއިދޫ ކަރާ ހަމަ ކޮލިޓީވާނެ. ތަފާތުވާނެ. ގޮއިދޫ ކަރާ އެއީ ބުރޭންޑެއް. އެ ޔަގީންކަން އަޅުގަނޑުދެން." ގޮއިދޫ ކައުންސިލްގެ ރައީސް ޝާހިދު ވިދާޅުވި އެވެ.

ދިހަ ބާވަތެއްގެ ކަރާ ގޮއިދޫގައި ހައްދާފައިވާއިރު އެންމެ ގިނައިން ހައްދާފައިވަނީ ކަޅުކަރަ އެވެ. ކަރާގެ ބާވަތްތަކުގެ އިތުރުން ބަރަބޮލުގެ ބާވަތްތަކާއި ކިޔުކަންބާވެސް ގޮއިދޫގެ ދަނޑުތަކުގައި އެބައޮތެވެ.

ޝާހިދު ވިދާޅުވީ ގޮއިދޫގައި އުފައްދާ ތަކެތީގެ ތަފާސް ހިސާބުތައް އެއްކޮށް ބަލަހައްޓަން ފަށަން ނިންމާފައިވާ ކަމަށާއި އެމަސައްކަތް މިއަހަރުކުރާނެ ކަމަށެވެ.

އުތުރުގައި، ރޯދައާ ދިމާކޮށް އެންމެ ފުޅާ ދާއިރާއެއްގައި ކަރާ ހައްދާ ގޮއިދޫން ފަސޭހައިން އެތަކެތި ގަނެވޭނެ އިންތިޒާމު ކައުންސިލް މެދުވެރިކޮށް ވަނީ ހަމަޖައްސައިދީފަ އެވެ. އެގޮތުން ކަރާ އަދި ދަނޑުވެރިކަމުން އެރަށުގައި އުފައްދާ ތަކެތި ގަންނަ ބޭނުންވާ ފަރާތްތަކުން ކައުންސިލްގެ ރައީސް އިބުރާހިމް ޝާހިދަށް ގުޅުއްވައިގެން ހަމަޖެހޭނެ އެވެ. ޝާހިދުގެ ނަމްބަރަކީ 9673878 އެކެވެ.