ބިލެއްފަހި ހެލްތު ސެންޓަރުގެ މުވައްޒަފުން ހުރިހާ ގެއަކަށް ރޯދަ ހަދިޔާ ބަހައިފި

ށ. ބިލެއްފަހި ހެލްތު ސެންޓަރުން ސަރުކާރު މުވައްސަސާ ތަކަށާއި އެ ރަށުގެ ހުރިހާ ގެއަކަށް ރޯދަ ހަދިޔާ ބަހައިފި އެވެ.

ކޭއޯއަށް މައުލޫމާތު ދެމުން ބިލެއްފަހި ހެލްތު ސެންޓަރުގެ މެނޭޖަރ އަހުމަދު ފައިސަލް ވިދާޅުވީ މިއީ ހުރިހާ މުވައްޒަފުންގެ މެދުގައި ފަންޑް ރައިޒްކޮށްގެން ކުރިއަށް ގެންދިޔަ ހަރަކާތެއްކަމަށާއި، އެގޮތުން 4 މުވައްސަސާއަކަށާއި 99 ގެއަކަށް ވަނީ އާންމުކޮށް ރޯދަ މަހު ބޭނުންކުރާ ސާމާނުގެ ހާއްސަ ޕެކެއް ހަދިޔާކޮށްފައެވެ.

މިއީ މިހާތަނަށް ރަށުގެ މުވައްސަސާއަކުން މިފަދަ ހަރަކާތެއް ކުރިއަށް ގެންދާ ފުރަތަމަ ފަހަރުކަން ފާހަގަކޮށް ފައިސަލް ވިދާޅުވީ ކުރިއަށް އޮތް އަހަރުތަކުގައި ވެސް ރޯދަމަހާ ދިމާކޮށް މި ހަރަކާތް ކުރިއަށް ގެންދެވޭނެ ކަމަށެވެ.

މި ހަރަކާތުގައި ގޭގެއަށް ގޮސް ހަދިޔާ ހަވާލުކޮށްފައިވަނީ ސެންޓަރުގެ ހުރިހާ މުވައްޒަފުން ޝާމިލް ވާގޮތަށް ކަމަށާއި، މިކަމަށް ރައްޔިތުންގެ ފަރާތުން ވަނީ ބޮޑު ތަރުހީބެއް ލިބިފަކަމަށް ފައިސަލް ވިދާޅުވި އެވެ.

މި ހަރަކާތުގައި ރަށުގައި ގާއިމްކޮށްފައިވާ އެސްޓީއޯ ފާމަސީގެ މުވައްޒަފުންގެ ބައިވެރިވުންވެސް ފައިސަލް ވަނީ ފާހަގަކޮށްފަ އެވެ.