ރޯދަމަހު ކުޅުދުއްފުށީގެ މަގުތައް ބެލެހެއްޓުން ވަނީ އިތުރު ކުރެވިފައި: ފުލުހުން

ރަމަޟާންމަހާ ދިމާކޮށް ކުޅުދުއްފުށީގެ މަގުމަތީގެ ރައްކާތެރިކަން ބެލެހެއްޓުން އިތުރުކުރެވިފައިވާ ކަމަށް ފުލުހުން ބުނެފި އެވެ.

ކޭއޯއިން ކުރި ސުވާލަކަށް ޖަވާބު ދެއްވަމުން ފުލުހުންގެ މީޑިޔާ އޮފިޝަލް ވިދާޅުވީ ކުޅުދުއްފުށީގައި ކޮންމެ ދުވަހެއްގެ ހަވީރު ގިނަ އަދަދެއްގެ ވެހިކަލް މަގުމައްޗަށް ނިކުންނާތީވެ އެގަޑިތަކުގައި މަގުމަތި ބެލެހެއްޓުމަށް އިތުރު ސަމާލުކަމެއްދީގެން ފުލުހުން މަސައްކަތް ކުރަމުން ދާނެކަމަށެވެ.

އިތުރަށް މީޑިޔާ އޮފިޝަލް ވިދާޅުވީ ރޯދައިގެ ކުރީން ފުލުހުން ކުޅުދުއްފުށީގައި ހިންގި އޮޕަރޭޝަން ތަކުގެ ސަބަބުން ރޭގަނޑުގެ ގަޑީގައި ރޭސްޖެހުމާއި ސައިލެންސަރު ފަޅައިގެން ދުއްވުން ކޮންޓުރޯލް ކުރެވިފައިވާ ކަމަށެވެ.

ކޮންމެ ރޯދަމަހަކުވެސް ހަވީރުގެ ވަގުތުތަކުގައި ގިނަ އަދަދެއްގެ ބަޔަކު ފިނި ބުރު ޖެހުމަށް ނިކުމެ އެވެ. އެހެންވުމުގެ ސަބަބުން އެހެން މަސްމަހާއި އަޅާ ބަލާއިރު ރޯދަމަހުގެ ހަވީރުގެ ވަގުތުގައި މަގުމަތީގެ ކާރުބާރު ބޮޑުވެ އެވެ.