އަންހެން މީހާއަށް އަނިޔާކުރި މީހުން އިންސާފުގެ ކުރިމައްޗަށް ގެންނާނަން: ޝިދާތާ

ށ. ފޭދޫގައި ނުކުޅެދުންތެރިކަން ހުންނަ އަންހެނަކު ނޭވާ ހާސްވާގޮތަށް ބޮލުގައި ގޯންޏެއް އަޅުވައި ހޮޅިދަނޑިއެއްގައި ބަނދެ، އަނިޔާކުރި މައްސަލަ ހިންގި ފަރާތްތަކުން ހޯދައި އިންސާފުގެ ކުރިމައްޗަށް ގެނައުމަށް ކުރެވެން ހުރި ހުރިހާ މަސައްކަތެއް ކުރާނެކަމަށް މިނިސްޓަރ އޮފް ޖެންޑާ ޝިދާތާ ޝަރީފް ވިދާޅުވެއްޖެ އެވެ. ފެންމަތިވެއްޖެ އެވެ.

އުމުރުން، 50 އަހަރުގެ މީހާ ބަނދެ، އަނިޔާކުރި މައްސަލަ ފެންމަތިވީ ސޯޝަލް މީޑިއާގައި ފޮޓޯތަކެއް ދައުރުވުމުންނެވެ. އެ ފޮޓޯތަކުން ފެންނަ ގޮތުގައި މަގުމަތީގައި ހުރި ހޮޅި ދަނޑިއެއްގައި ވާގަނޑަކުން އޭނާ ބަނދެފައި ހުރީ ބޮލަށް ގޯންޏެއް މަހާފަ އެވެ.

މިކަމާ ގުޅިގެން ޖެންޑާ މިނިސްޓަރު ޝިދާތާ ވިދާޅުވީ އެ އަނިޔާވެރި އަމަލު ހިންގި ފަރާތްތައް ހޯދައި އިންސާފުގެ ކުރިމައްޗަށް ގެނައުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ. އެކަމުގެ ރިޕޯޓް ލިބުމާއެކު އެ މީހާއަށް ބޭނުންވާ ރައްކާތެރިކަން ދައުލަތުން ފޯރުކޮށްދީފައިވާކަމަށްވެސް މިނިސްޓަރު ވިދާޅުވި އެވެ.

ށ.ފޭދޫގައި އަންހެނަކަށް ރަހުމުކުޑަ އަނިޔާތަކެއް ދިން މައްސަލައެއްގެ ރިޕޯޓު ލިބުމާއެކު އޭނާއަށް ބޭނުންވާ ރައްކައުތެރިކަން ދައުލަތުން ވަނީ ފޯރުކޮށްދީފައި. މި އަނިޔާވެރި ޢަމަލު ހިންގި ފަރާތްތައް ހޯދައި އިންސާފުގެ ކުރިމައްޗަށް ގެނައުމަށް ކުރެވެން ހުރި ހުރިހާ މަސައްކަތެއް ކުރާނަން.

— Shidhatha Shareef (@shidhatha) May 15, 2019

ކައިވެންޏެއްކޮށް އުޅޭ އެ އަންހެން މީހާގެ 5 ކުދިން ތިބޭއިރު އާއިލާގެ މީހުންވެސް އެރަށުގައި ދިރިއުޅެ އެވެ. އެ މީހާގެ ފަސް ދަރިންގެ ތެރެއިން 18 އަހަރު ފުރިފައިވާ ބައެއް ކުދިންނަކީވެސް ނުކުޅެދުންތެރިކަން ހުންނަ މީހުންކަމުން އެ މީހާ ދިރިއުޅެނީ ފިރިމީހާއާއެކު ވަކިން ގެޔެއްގައި ކަމަށް މައުލޫމާތުލިބެ އެވެ.