އީދު މުބާރިކް! މާދަމާއަކީ ފިތުރު އީދު ދުވަސް

މާދަމާއަކީ މި އަހަރުގެ ފިތުރު އީދު ދުވަސްކަމަށް މިނިސްޓްރީ އޮފް އިސްލާމިކް އެފެއާޒް މިރޭ ކަނޑައަޅައި، ރަސްމީކޮށް އިއުލާންކޮށްފި އެވެ. ޝައްވާލުމަހުގެ ހަނދު ސާބިތުކުރުމަށްޓަކާ މިރޭ އިސްލާމިކް މިނިސްޓްރީގައި ބޭއްވި ބައްދަލުވުމުގައި ނިންމި ގަރާރު އިއްވަވާދެއްވީ ސްޓޭޓް މިނިސްޓަރު ޝެއިޙް އިލްޔާސް ޖަމާލެވެ.

ހަނދު ސާބިތުކުރުމުގެ ގަރާރު އިއްވަވަމުން ވިދާޅުވީ މިއަދު އިރުއޮއްސުމަށް ފަހު ދިވެހިރާއްޖޭގެ ހުރިހާ ހިސާބަކަށާއި ގިނަ އިސްލާމީ ގައުމުތަކަށް 1440 ވަނަ އަހަރުގެ ޝައްވާލުމަހުގެ ހުޅެވި ހަނދު ފެންމަތިވެފައި ހުންނާނެކަމަށް އިތުބާރު ހުރި ފަލަކީ ހިސާބުން ޔަގީންވާ ކަމަށެވެ.

މިއަހަރުގެ ރޯދަމަކީ 29 މަހެއްކަން ނިންމާ، އިސްލާމިކް މިނިސްޓަރު ޑރ އަހުމަދު ޒާހިރު ސޮއިކުރައްވާ ނެރުނު ގަރާރު އިއްވަވަމުން އިލްޔާސް ޖަމާލު ވިދާޅުވީ، އިސްލާމީ ބައެއް ގައުމުތަކަށްވެސް 1440 ވަނަ އަހަރުގެ ހަނދު ސާބިތުވެއްޖެކަމުގެ ޙަބަރު ރަސްމީގޮތުން ލިބިފައިވާތީ އާއި ރަމަޟާންމަހުގެ ހަނދު ސާބިތުކުރުމަށް ރާއްޖޭގައި އަމަލުކުރުމަށް ހަމަޖެހިފައިވާ އުސޫލުގައިވާ ގޮތުގެ މަތިން މާދަމާއަކީ ފިތުރު އީދު ދުވަސްކަމަށް ކަނޑައެޅީ ކަމަށެވެ.