ކުޅުދުއްފުއްޓަށް ބޯކޮށް ވާރޭވެހި ފެންބޮޑުވެ، ބައެއް ގެތަކަށް ގެއްލުންވެއްޖެ

ކުޅުދުއްފުއްޓަށް މިއަދު ކުރި ވިއްސާރާގައި ފެންބޮޑުވެ ބައެއް ގެތަކަށް ގެއްލުންވެއްޖެ އެވެ. މިއަދު މެންދުރުން ފެށިގެން ބޯކޮށް ވާރޭވެހުމުގެ ސަބަބުން އާންމު ދަތުރުފަތުރުތަކަށްވެސް ވަނީ ހުރަސް އެޅިފަ އެވެ.

ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން ކޭއޯއަށް ވިދާޅުވީ، ފެންބޮޑުވެ ގިނަ ގެތަކަށް ފެންވަދެފައިވާކަމުގެ ރިޕޯޓް ކައުންސިލަށް ލިބިފައިވާކަމަށާއި 6 ގެޔަކަށް ދިރިއުޅެން ދަތިވާވަރަަށް ފެނުގެ އަސަރުކޮށްފައިވާ ކަމަށެވެ. އަދި ދެ ގެޔެއްގައި ދިރިނޫޅެވޭވަރަށް ފެންބޮޑުވެ ގެއްލުންވެފައިވާތީ އެ ދެ އާއިލާ ރައްކާތެރި ތަނަކަށް ބަދަލުކުރުމުގެ މަސައްކަތް ކުރަމުންދާ ކަމަށެވެ.

ބައެއް ސަރަހައްދުތަކުގައި ދެ ފޫޓަށްވުރެ ބޮޑަށް ފެންބޮޑުވެފައިވާއިރު ބޮޑަށް ފެންބޮޑުވެ، ފެނުގެ އަސަރުކޮށްފައިވަނީ ރަށުގެ ދެ ފަރާތަކަށެވެ. އެއީ ހަސަނާތު މިސްކިތު ސަރަހައްދާއި ނޫރު މިސްކިތު ސަރަހައްދުގެ ގޭބިސީތަކަށެވެ.

ލަތީފް ވިދާޅުވީ ފެންބޮޑުވުމުގެ ރިޕޯޓް ލިބުމާއެކު އެކަން ޑިޒާސްޓާ މެނޭޖްމަންޓް އޮތޯރިޓީ އަންގާފައިވާނެ ކަމަށެވެ. އަދި ޑިޒާސްޓާ އާއި އެމްއެންޑީއެމް އާއި ފަޔަރ، ފުލުހުންނާއި ކައުންސިލް އަދި ރެޑްކުރެންސެންޓާއި ފަބުލިކް ވޯކްސް ގުޅިގެން ފެންހިންދުމުގެ މަސައްކަތް ކުރަމުން އަންނަ ކަމަށެވެ.