ނޮޅިވަރަމުގައިވެސް ފެންބޮޑުވެ 16 ގެޔަކަށް ގެއްލުންވެއްޖެ

އުތުރަށް ކުރަމުންދާ ވިއްސާރާގައި ހދ ނޮޅިވަރަމަށް ބޯކޮށް ވާރޭވެހި ބައެއް ގެޔަކަށް ގެއްލުންވެއްޖެ އެވެ. ނޮޅިވަރަމަށްވެސް ވާރޭވެހެން ފެށީ މިއަދު މެންދުރުން ފެށިގެންނެވެ.

ނޮޅިވަރަމް ކައުންސިލް މެމްބަރު ނަސީރު މިއަދު ކޭއޯއަށް ވިދާޅުވީ ބޯކޮށް ވާރޭވެހުމުގެ ސަބަބުން މިހާތަނަށް 16 ގެޔަކަށް ދިރިނޫޅެވޭ ވަރަށް ފެން ވަދެ ގެއްލުންވެފައިވާ ކަމަށެވެ.

ޑިޒާސްޓާއަށާއި އެމްއެންޑީއެފްގައި އެހީތެރިކަމަށް އެދިފައިވީނަމަވެސް އަދި މިހާތަނަށް އެފަރާތްތަކުގެ ޙަބަރެއް ނުވާކަމަށް ނަސީރު ވިދާޅުވި އެވެ. އޭނާ ވިދާޅުވީ ފެންހިންދުމުގެ މަސައްކަތްކުރަމުންދަނީ އެންމެ ޕަމްޕަކުން ކަމަށާއި އެކަމުގައި ރައްޔިތުންނާއި ކައުންސިލާއި އަދި ޕޮލިސް ޑެސްކްގެ އެހީތެރިކަން ލިބެމުންދާ ކަމަށެވެ.

ދިރިނޫޅެވޭ ވަރުވެފައިވާ ގެތަކުގެ އާއިލާތަކުން އެފަރާތްތަކުގެ އާއިލީ ގެތަކަށް ބަދަލުވަމުންދާ ކަމަށެވެ. ފެންގަނޑު ހިނދުމަށްޓަކާ ރަށުގެ ކުޅިއަށް ކޯރު ކަނޑާފައިވާކަމަށްވެސް އޭނާ ވިދާޅުވި އެވެ.

މިއަދު ކުރި ވިއްސާރާގައި ނޮޅިވަރަމުގެ އިތުރުން ކުޅުދުއްފުށީގައިވެސް ވަނީ ފެންބޮޑުވެ ގެތަކަށް ގެއްލުންވެފަ އެވެ. މޫސުމާ ބެހޭ އިދާރާއިން ލަފާކުރާގޮތުގައި ކުރިއަށް 24 ގަޑިއިރުވެސް ރާއްޖޭގެ ބޮޑު ސަރަހައްދަކަށް ބޯކޮށް ވާރޭވެހޭނެ އެވެ.