އަސްރަފީ ބޭސްފިހާރައިން އާސަންދައިގެ ހިދުމަތް މިހާރު ލިބޭނެ: އާސަންދަ

ކުޅުދުއްފުށީ އަސްރަފީ ބޭސްފިހާރައިން އާސަންދަ މެދުވެރިކޮށް ދެމުންދިޔަ ހިދުމަތުގައި ދިމާވި މައްސަލައެއްގެ ސަބަބުން އާސަންދަ ހިދުމަތް ވަގުތީގޮތުން މެދުކަނޑާލާފައި އޮތްއޮތުން ނިމުމަކަށް ގެނައުމަށްފަހު، މިހާރު އެބޭސްފިހާރައިން އާސަންދައިގެ ހިދުމަތް ލިބިގެންދާނެކަމަށް އާސަންދަ ކުންފުނިން ބުނެފިއެވެ.

އާސަންދަ ކުންފުނީގެ މީޑިޔާ އޮފިޝަލް ވިދާޅުވީ ކުޅުދުއްފުށީ އަސްރަފީ ބޭސްފިހާރާއިން ހިދުމަތް ދިނުމުގެ މައްސަލަތަކެއް ފާހަގަ ކުރެވިފައި ހުރުމުން އެމައްސަލަތައް ބަލަން ވެގެން ވަގުތީ ގޮތުން އާސަންދައިގެ ހިދުމަތް މެދު ކަނޑާލެވުނުކަމަށެވެ.

"ސަސްޕެންޝަން މިހާރުވާނީ އުވާލާފައި. މިހާރު އާސަންދައިގެ ހިދުމަތް ލިބިގެންދާނެ އެބޭސްފިހާރައިން" މީޑިޔާ އޮފިޝަލް ވިދާޅުވިއެވެ.

އާސަންދައިން ބުނީ އިއްޔެ ވާނީ ކުޅުދުއްފުށީ އަސްރަފީ ބޭސްފިހާރައަށް އަލުން އެހިދުމަތް ދިނުމަށް އަންގާފައިކަމަށާއި މިހާރު އެހިދުމަތް އެތަނުން ރައްޔިތުންނަށް ލިބިގެންދާނެއެވެ.

ކުޅުދުއްފުށީ އަސްރަފީ ކެމިސްޓުން ބުނީ އާސަންދަ ކުންފުނިން އިއްޔެ އެހިދުމަތް ދިނުމަށް އަންގާފައިވާކަމަށާއި ކުރިއެކޭވެސް އެއްގޮތަށް އާސަންދަ ހިދުމަތް އަސްރަފީ ކެމިސްޓުން ލިބިގެންދާނެ ކަމަށެވެ.

ކުޅުދުއްފުއްޓަކީ ދުވާލަކު އެތައްސަތޭކަ ބަޔަކު ސިއްހީ ހިދުމަތް ހޯދުމަންދާ ރަށެކެވެ. އާސަންދަ މެދުވެރިކޮށް ބޭސް ދޫކުރަމުންދާ އަސްރަފީ ކެމިސްޓުން ނިމިދިޔަ ރަމަޟާން މަހުގެ ފަހުކޮޅުން ފެށިގެން މިއަދާ ހަމައަށް އާސަންދަ ހިދުމަތް މެދުކެނޑިފައި އޮތުމުން، ގިނަބައެއްގެ ފާޑުކިއުން ދިޔައީ އާސަންދަ ކުންފުންޏަށް އަމާޒު ކުރަމުންނެވެ.