ކޭއާރުއެޗުގައި ހިތުގެ ހާއްސަ ބަލިތަކަށް ފަރުވާދޭ ސެންޓަރެއް ހެދުމަށް ބަޔަކާ ހަވާލުކޮށްފި

ކުޅުދުއްފުށި ރީޖަނަލް ހޮސްޕިޓަލުގެ ކާޑިއެކް ނުވަތަ ހިތުގެ ހާއްސަ ބަލިތަކަށް ފަރުވާ ސެންޓަރު ހެދުމަށް ބޭނުންވާ މަރާމާތުތައް ކުރުމަށް ވޭވް ލެންތް ކޮމްޕެނީއާ މިއަދު ހަވާލުކޮށްފި އެވެ.

ކޭއާރުއެޗްގައި މިއަދު ބޭއްވި ހަފްލާއެއްގައި މި އެއްބަސްވުމުގައި ކޭއާރުއެޗުގެ ފަރާތުން ސޮއިކުރެއްވީ އެ ހޮސްޕިޓަލުގެ މެނޭޖަރ ހަދިޖާ އަލީ އެވެ. އަދި ވޭވްލެންތުގެ ފަރާތުން ސޮއިކުރެއްވީ ވޭވްލެންތުގެ މެނޭޖަރ ޔޫނުސް އިބްރާހިމެވެ.

ކޭއޯއަށް މައުލޫމާތު ދެމުން ހާދީޖާ ވިދާޅުވީ ވޭވް ލެންތާ އެ މަސައްކަތް ހަވާލުކުރީ 55 ދުވަހުގެ ތެރޭގައި ކާޑިއެކް ސެންޓަރުގެ މަސައްކަތް އެއްކޮށް ނިންމާގޮތަށެވެ. މި ސެންޓަރު ގާއިމް ކުރުމަށް ހަމަޖެހިފައިވަނީ ކޭއާރުއެޗްގައި ކުރިން ފިޒިއޮތެރަޕީ ދިން ބައިގައެވެ.

ހަދިޖާ ވިދާޅުވީ އުންމީދަކީ ސެންޓަރުގެ މަސައްކަތް ނިމުނުހާއި އަވަހަށް ކާޑިއެކްގެ ހިދުމަތްތައް ރައްޔިތުންނަށް ފޯރުކޮށްދިނުން ކަމަށާ، އެގޮތުން ސެންޓަރު ހުޅުވުމާއެކު އެކޯކާޑިއޮގްރާމް، ޓްރެޑްމިލް، އީސީޖީ އަދި ކާޑިއެކު ކޮންސަލްޓޭޝަންގެ ހިދުމަތް ލިބިގެން ދާނެ އެވެ.

ކުޅުދުއްފުށީ ރީޖަނަލް ހޮސްޕިޓަލުގައި އަންނަނީ މިއަހަރު މާޗު މަހުން ފެށިގެން ހިތުގެ ސްކޭނިންގެ ހިދުމަތް ދެމުންނެވެ.