ނޮޅިވަރަންފަރާއި ހަނިމާދޫ ރައްޔިތުން ދެއްކި އެކުވެރިކަމާއި އެއްބައިވަންތަކަމަށް ޝުކުރިއްޔާ: ނަޝީދު
ހދ ނޮޅިވަރަންފަރުން ފުރައިގެން އެއަތޮޅު ހަނިމާދޫއަށް ދަތުރުކުރި ލޯންޗެއް ބަނޑުން ޖަހާލައި ފަސް މީހުން މަރުވި ހިތާމަވެރި ހާދިސާގައި ހަނިމާދޫ ރައްޔިތުން، ނޮޅިވަރަންފަރުގެ ރައްޔިތުންނަށް ބެހެއްޓި ގާތްކަމާއި އެކުވެރިކަމަށްޓަކާ ނޮޅިވަރަމް ދާއިރާގެ މެމްބަރު މުހައްމަދު ނަޝީދު އަބުދުﷲ ޝުކުރުއަދާކުރައްވައިފި އެވެ.
ފަސް މީހުން މަރުވި މި ހާދިސާގައި ލޯންޗު ބަނޑުން ޖަހާލީ ހަނިމާދޫއާ ވަރަށް ގާތްވެފައިވަނިކޮށް ކޮޅިގަނޑެއްގައި ޖެހި އެވެ.
މުހައްމަދު ނަޝީދު އަބުދުﷲ މިދިޔަ ހުކުރުދުވަހު ކުރި ޓްވީޓެއްގައި ވިދާޅުވެފައިވަނީ ނޮޅިވަރަންފަރަށް ދިމާވި ހިތާމަވެރި ހާދިސާގައި ނޮޅިވަރަންފަރު ރައްޔިތުންނާއި ހަނިމާދޫ ރައްޔިތުން ދެއްކި އެކުވެރިކަމާއި އެއްބައިވަންތަކަމަށް ޝުކުރު އަދާކުރައްވާ ކަމަށެވެ.
Nolhivaranfaru ah iyye dhimaavi hithaama veri haadhisaa gai Nolhivaranfaru raeethun naa hanimaa Hanimaadhoo raeethun dhekkevi ekuveri kamaa ebbai vantha kamaa ehee theri kamah sukurai saabas dhannavan. sukuriyya dherashuge emmehai Raeethun nah
— Mohamed Nasheed Abdulla (@MNA_MosTaaA) August 30, 2019
ނަޝީދު ވިދާޅުވީ މީގެ ފަނަރަ އަހަރު ކުރިން ކުރިމަތިވި ސުނާމީ ކާރިސާގައިވެސް ނޮޅިވަރަންފަރަށް އެންމެ ބޮޑު އެހީތެރިކަމާއި އެއްބާރުލުމެއް ލިބިގެންދިޔައީ ހަނިމާދޫގެ ރައްޔިތުންގެ ފަރާތުން ކަމަށެވެ.
މިއީ އެއްބައެއް، އެއް އާއިލާއެއްކަން ދައްކަމުން މިހާރެކޭ އެއްގޮތަށް އަބަދުވެސް ކުރިއަށްދާނެ ކަމަށް އުންމީދުކުރާކަމަށް އޭނާ ވިދާޅުވެފައިވެ އެވެ.
