ސުޕްރީމް ކޯޓަށް އައްޔަން ކުރުމަށް ޝުޖޫނާއި އަޒްމިރަލްދާއަށް ރުހުން ދީފި

ރާއްޖޭގެ ތާރީހުގައި ފުރަތަމަ ފަހަރަށް އެންމެ މަތީ ކޯޓަށް އަންހެން ފަނޑިޔާރުން އައްޔަން ކުރަން ރުހުން ދިނުމަށް ރައްޔިތުންގެ މަޖިލީހުން މިއަދު ފާސްކޮށްފި އެވެ.

ސުޕްރީމް ކޯޓުގެ ފަނޑިޔާރު ކަމަށް ހައި ކޯޓުގެ ކުރީގެ ފަނޑިޔާރު ޑރ. އަޒްމިރަލްދާ ޒާހިރު އާއި، ސިވިލް ކޯޓުގެ ކުރީގެ ފަނޑިޔާރު އައިޝާ ސުޖޫން އައްޔަން ކުރަން މިއަދު މަޖިލީހުން ފާސްކުރީ ޖަލްސާގައި ނެގި ވޯޓުގައި ބައިވެރިވެވަޑައިގެންނެވި 64 މެންބަރުންގެ ތެރެއިން 62 މެންބަރުންގެ އަޣުލަބިއްޔަތުންނެވެ.

ޑރ. އަޒްމިރަލްދާ ހައިކޯޓުން 2016 ގައި އިސްތިއުފާދެއްވިއިރު، އެކަމަނާއަކީ ހައި ކޯޓުގެ ބެންޗުގައި އެހާތަނަށް އިންނެވި ހަމަ އެކަނި އަންހެން ބޭފުޅާ އެވެ. އަދި ޝުޖޫން 2014 ގައި ސިވިލް ކޯޓުން އިސްތިއުފާދެއްވިއިރު، އެކަމަނާ އަކީ ރާއްޖޭގައި ފަނޑިޔާރުކަން ކުރުމުގެ ފުުރުސަތު އެންމެ ފުރަތަމަ ލިބިވަޑައިގަތް އަންހެން ދެ ބޭފުޅުންގެ ތެރެއިން އެކަކެވެ.

ސުޕްރީމް ކޯޓުގެ ފަނޑިޔާރު ކަމަށް ދެ އަންހެން ބޭފުޅުންގެ ނަން ރައީސް ހުށަހެޅުއްވުމުން ދީނީ އިލްމުވެރިންގެ ދެބަސްވުން އުފެދުނެވެ. އެ ގޮތުން ބައެއް އިލްމުވެރިން ވަނީ އެއީ ދީނުގައި ހުއްދަ ކަމެއް ނޫން ކަމަށް ބުނެ ރައީސްގެ ނިންމެވުން ބަދަލު ކުރެއްވުމަށް ގޮވާލައިފަ އެވެ.

ސުޕްރީމް ކޯޓުގެ ބެންޗަށް އިތުރުވި ދެ މަގާމަށް ކުރިމަތިލުމަށް ޖުޑިޝަލް ސާވިސް ކޮމިޝަން (ޖޭއެސްސީ) އިން ހުޅުވާލި ފުރުސަތުގައި ހައި ކޯޓުގެ ހަތަރު ފަނޑިޔާރަކު ވެސް ކުރިމަތިލި އެވެ. ފަނޑިޔާރުންނާ އިންޓިވިއު ކުރުމަށްފަހު ޖޭއެސްސީން ރައީސަށް ލަފާ ދިނީ ރައީސް ހުށަހެޅުއްވި ދެ ފަނޑިޔާރުން އައްޔަން ކުރުމަށެވެ.