ދިވެހިންގެ މައްޗަށް ބަސްކިޔެންވާނީ ދިވެހިންނަށް: ޔާމީން

ރާއްޖޭގައި އޮންނަން ވާނީ މިނިވަން މުސްތަގިއްލު ދައުލަތެއް ކަމަށާއި ދިވެހިންގެ މައްޗަށް ބަސް ކިޔެން ވާނީ ދިވެހިންނަށް ކަމަށް އިދިކޮޅު ލީޑަރު ކުރީގެ ރައީސް އަބްދުﷲ ޔާމީން އަބްދުލް ގައްޔޫމް ވިދާޅުވެއްޖެއެވެ.

ރައީސް ޔާމީން މިހެން ވިދާޅުވީ އިދި ކޮޅު ކޯލީޝަން ޕީޕީއެމް އާއި ޕީއެންސީ ގުޅިގެން ރޭ އދ. މަހިބަދޫގައި ކުރިއަށްގެންދިޔަ ޖަލްސާގައި ބައިވެރިވެ ވަޑައިގެން ވާހަކަފުޅު ދައްކަވަމުންނެވެ.

ރައީސް ޔާމީން ވިދާޅުވީ އެމްޑީޕީ އިސްވެ ހިންގަމުންގެންދާ ސަރުކާރުގެ ސިޔާސަތުތައް ބައްޓަން ކުރެވިފައި އޮތީ ވަކި ގައުމެއް ބޭނުންވާ ގޮތަށް ކަންކަންކުރާ ގޮތަކަށް ވުމުން އެ ސިޔާސަތާއެކު ރާއްޖެއާއި ރައްޔިތުންގެ މަސްލަހަތު ނެތް ކަމަށެވެ

"ޕީޕީއެމް ފިކުރު ގަބޫލުކުރާގޮތަކީ ރާއްޖޭގައި އޮންނަންވާނީ މިނިވަން މުސްތަގިއްލު ދައުލަތެއް. ދިވެހިންގެ ދާހިލީ ކަންކަމާއި ހާރިޖީ ކަންކަން ނިންމުމުގައި ފުރިހަމަ ސިޔާދަތާއި ބާރު ދިވެހިންނަށް ލިބެން ޖެހޭނެ. ދިވެހީންގެ މައްޗަށް ބަސްކިޔެންވާނީ ދިވެހިން ކަމަށާއި ކުރިއަށް އޮތް ދުވަސްތަކުގައި އަޅުގަނޑުމެންނަށްވެސް އުފާފާގަތިކަމާއި ރައްޔިތުންގެ މަސްލަހަތު ކުރިއަށްގެންދެވެން އޮތީ މިފިކުރު އޮވެގެން." އިދިކޮޅު ލީޑަރު ރައީސް ޔާމީން ވިދާޅުވިއެވެ.

އިތުރަށް ރައީސް ޔާމީން ވިދާޅުވީ އެހެން ގައުމުތަކަށް ބަރޯސާވާ ހާރިޖީ ސިޔާސަތަކީ ރައްޔިތުންގެ މަސްލަހަތާއި ރާއްޖޭގެ މަސްލަހަތު އޮތް ގޮތެއް ވެސް ނޫންކަމަށެވެ އަދި ގައުމުގެ ތަރައްޤީގެ މަޝްރޫޢުތަކެއް އެމިސްރާބަކަށް ނުހިންގޭނެކަމަށެވެ .

"ކުރިއަށް އޮތް ދުވަސްތަކުގައި އަޅުގަނޑުމެންނަށް ވެސް އުފާ ފާގަތި ކަމާއި އަދި ރައްޔިތުންނަށް މަސްލަހަތު ކުރިއަށް ގެންދެވޭނީ މި ފިކުރު އޮވެގެން. އެހެން ގައުމުތަކަށް ބަރޯސާވާ ހާރިޖީ ސިޔާސަތަކީ ރައްޔިތުންގެ މަސްލަހަތު އޮތް ގޮތެއް ނޫން. އެއީ ރާއްޖޭގެ މަސްލަހަތު އޮތް ގޮތެއް ވެސް ނޫން. އަޅުގަނޑުމެން ގައުމުގެ ތަރައްގީގެ މަޝްރޫއުތަކެއް އެ މިސްރާބަކަށް ނުހިނގާނެ." ރައީސް ޔާމީން ވިދާޅުވި އެވެ.

އެމްޑީޕީގެ ވިސްނުމުގައި އިސްލާމް ދީނަށާއި އިންސާނީ ކަރާމާތަކަށް ޖާގަ ނުދޭ ކަމަށާއި ރާއްޖޭގެ ސިޔާދަތަކަށް ވެސް ފުރުސަތު ނުދޭ ކަމަށް އެޖަލްސާގައި ވާހަކަފުޅުދައްކަވަމުން ރައީސް ޔާމީން ވިދާޅުވިއެވެ.

ދުނިޔޭގެ އިގްތިސާދު ބަވަނަވެފައި އޮތުމަކީ އަޅުގަނޑުމެންގެ ހާރިޖީ ސިޔާސަތު ވަކި ގައުމަކަށްޓަކައި ވަކި ގޮތަކަށް ބައްޓަން ކުރަން މަޖުބޫރުވާ ކަމެއް ނޫންކަމަށާއި ގައުމުގެ ދާހިލީ ހަމަޖެހުން ވެސް އޮތީ މިއީ މިނިވަން އިގްތިސާދަކާއި އިސްލާމް ދީނުގެ މަތީގައި އޮތުމަށް ބާރު އަޅާ ހާރިޖީ ސިޔާސަތަކާއެކުކަމަށް ރައީސް ޔާމީން ވިދާޅުވި އެވެ.

ރައީސް ޔާމީން ރޭގެ ޖަލްސާގައި ވާހަކަފުޅު ދައްކަވަމުން ވިދާޅުވީ ސިޔާސީ ޕާޓީއަކީ ފިކުރެއް ކަމަށާއި ޕީޕީއެމްގެ ފިކުރަކީ އެމްޑީޕީގެ ސެކިއުލާ ވިސްނުމާއި މުޅިން އިދިކޮޅު ވިސްނުމެއް ކަމަށެވެ.

އަދި ޕީޕީއެމް ފިކުރުގެ މައިގަނޑު އަސާސަކީ އިސްލާމް ދީން ކަމުގައި ވާއިރު ޕާޓީގެ ފިކުރަށްވުރެ ދިވެހި ޤައުމުގެ މަސްލަހަތާ އިސްލާމްދީނުގެ މަތިވެރި އުސޫލުތައް އެ ޕާޓީއަށް މުޙިންމު ކަމަށާއި ޕީޕީއެމް އަށްވުރެ ވަރުގަދަޔަށް އެ އުސޫލުތައް ކަނޑައެޅިފައިވާ ޕާޓީއެއް ރާއްޖޭގައި ނޯންނާނެ ކަމަށްވެސް ރައީސް ޔާމީން ވިދާޅުވިއެވެ.

ރޭ އިދިކޮޅު ފަރާތްތަކުން އދ. އަތޮޅުގައި ބޭއްވި ޖަލްސާއަކީ ޕީޕީއެމްގެ ސަރުކާރު ނިމުނުފަހުން އެ ޕާޓީން އަތޮޅުތެރޭގައި ބޭއްވި ފުރަތަމަ ޖަލްސާއެވެ.