ހދ ގެ ރައްޔިތުން ފަތުރުވެރިކަމުގައި ދެކެމުން އައި ހުވަފެނުގައި މިސަރުކާރުން ކުލަ ޖައްސައިދޭނެކަން ޔަގީން: އާތިފް
ހދ އަތޮޅުގައި ފަތުރުވެރިކަން ތަރައްގީވެފައި އޮތުމަށް އެއަތޮޅުގެ ރައްޔިތުން ދެއްކެމުންދާ ހުވަފެނުގައި މިސަރުކާރުން ކުލަ ޖައްސައިދޭނެކަމާމެދު ޝައްކު ނުކުރައްވާކަމުގައި ހދ އަތޮޅު ކައުންސިލްގެ ކުރީގެ ރައީސް އަހުމަދު އާތިފް ވިދާޅުވެއްޖެ އެވެ.
އާތިފް މިހެން ވިދާޅުވެފައިމިވަނީ ހދ އަތޮޅުގައި ރިސޯޓް ހަދަން ދޫކުރަން ހަމަޖެހިފައިވާ ރަށްތައް އޮކްޓޯބަރު ތިންވަނަ ދުވަހު އިއުލާންކުރައްވާނެކަމަށް ފަތުރުވެރިކަމާ ބެހޭ ވަޒީރު އަލީ ވަހީދު ވިދާޅުވެފައިވަނިކޮންނެވެ.
ޓޫރިޒަމް ޖޮބް ފެއާ ފެށުމަށް ރޭ ބޭއްވި ރަސްމިއްޔާތު މިނިސްޓަރު އަލީ ވަހީދު ވިދާޅުވެފައިވަނީ ހދ އަތޮޅުގެ ރަށްތަކެއް ފަތުރުވެރިކަމަށް ދޫކުރުމަށް ހަމަޖެހިފައިވާ ކަމަށާއި އެރަށްތައް އިއުލާންކުރައްވާނީ އަންނަ އޮކްޓޯބަރުމަހު ބާއްވާ ހާއްސަ ރަސްމިއްޔާތެއްގައި ރައީސުލް ޖުމްހޫރިއްޔާ ކަމަށެވެ.
ޓޫރިޒަމް ދުވަހާ ގުޅުވައިގެން އާތިފް މިއަދު ވިދާޅުވީ، ފަތުރުވެރިކަމުގެ ފޮނިމީރުކަމުން ހދ އަތޮޅަށް ވަނީ ނުލިބި ކަމަށާ ވޭތުވެދިޔަ 47 އަހަރު އެކަން އޮތީ ކުލައެއްނުވާ ހުވަފެނެއްގެ ގޮތުގައިކަމަށެވެ.
ޓުއަރިޒަމް ދުވަސް ފާހަގަކުރާއިރު ހދގެ ރައްޔިތުންނަށް ފޮނިމީރުކަން މވަނީ ނުލިބިއެވެ. ވޭތުވެދިއަ 47 އަހަރު އެކަން އޮތީ ކުލައެއްނުވާ ހުވަފެނެއްގެ ގޮތުގައެވެ. @ibusolih ގެ ޒައާމަތުގައި @ali20waheed ހދގެ ރައްޔިތުންގެ ހުވަފެނުގައި ކުލަ ޖައްސައިި ދެއްވާނެކަމާ މެދަކު ޝައްކެއް ނެތެވެ.
— Ahmed Athif (@Ahmed_Athif) September 28, 2019
އެކަމަކު ރައީސް އިބުރާހިމް މުހައްމަދު ސޯލިހް ޒަމާއަތުގައި މިނިސްޓަރު އަލީ ވަހީދު ހދ އަތޮޅުގެ ރައްޔިތުންގެ އެ ހުވަފެނުގައި ކުލަ ޖައްސައިދެއްވާނެކަމާމެދު ޝައްކުނުކުރައްވާކަމަށް އާތިފް ވިދާޅުވި އެވެ.
ރާއްޖޭގެ ފަތުރުވެރިކަމަށް 47 އަހަރުވެގެންދިޔަ އިރު ހދ އަތޮޅަކީ ފަތުރުވެރިކަމުގެ ފޮނިމީރުކަން ނުލިބިވާ އަތޮޅެވެ. 2006 ވަނަ އަހަރުން ފެށިގެން ރިސޯޓް ތަރައްގީކުރުމަށް ހދ ގެ ރަށްތަކަށް އެކި ކުންފުނިތަކާ ހަވާލުކޮށްފައިވެ އެވެ.
