ހދ އަތޮޅުގެ 4 ރަށެއްގެ ފުޓްބޯޅަ ދަނޑުގައި ސަބް ބޭސް އަޅަން ބަޔަކާ ހަވާލުކޮށްފި

ހދ އަތޮޅުގެ ހަތަރު ރަށެއްގެ ފުޓްބޯޅަ ދަނޑުގެ ސަބް ބޭސް އަޅަން ބަޔަކާ ހަވާލުކޮށްފި އެވެ. އެރަށްތަކީ ކުޅުދުއްފުށި، ނެއްލައިދޫ، ހަނިމާދޫ އަދި ނޮޅިވަރަމެވެ.

މިނިސްޓްރީ އޮފް ޔޫތު، ސްޕޯޓްސް އެންޑް ކޮމިއުނިޓީ އެމްޕަވަރމަންޓްގައި ބޭއްވި ރަސްމިއްޔާތެގައި މި ހަތަރު ރަށުގެ އިތުރުން ނ. ކުޑަފަރީގެ ފުޓްބޯޅަ ދަނޑުގެ ސަބް ބޭސް ތައްޔާރު ކުރުމަށް ހަވާލުކޮށްފަ އެވެ.

މި އެއްބަސްވުންތަކުގައި މިނިސްޓްރީގެ ފަރާތުން ސްޓޭޓް މިނިސްޓަރ އަސްހަދު އަލީ ސޮއިކުރެއްވިއިރު އާރްކޭއެލް ގްރޫޕްގެ ފަރާތުން ސޮއިކުރެއްވީ އެ ކުންފުނީގެ މެނޭޖިން ޑިރެކްޓަރ ހުޒައިމާ އާސިރެވެ. އަދި ފްލެކްސް އިންކްގެ ފަރާތުން އެއްބަސްވުންތަކުގައި ސޮއިކުރެއްވީ އެކުންފުނީގެ މެނޭޖިން ޑިރެކްޓަރ ނަޖާހް ޝަރީފެވެ.

ކުޅުދުއްފުއްޓާއި ހަނިމާދޫ އަދި ނެއްލައިދޫގެ ދަނޑުގެ ސަބް ބޭސް މަސައްކަތް ހަވާލުކޮށްފައިވަނީ އާރްކޭއެލް ގުރޫފާ އެވެ. އެ ތިން ދަނޑުގައި ސަބް ބޭސް މަސައްކަތް ހަވާލުކޮށްފައިވަނީ 4.032 މިލިއަން ރުފިޔާއަށެވެ. އެއީ ކޮންމެ ދަނޑަކަށް 1.344 މިލިއަނަށެވެ.

މީގެ އިތުރުން ނެއްލައިދޫ ދަނޑުގެ ސަބް ބޭސް މަސައްކަތް 1.190 މިލިއަން ރުފިޔާއަށް ފްލެކްސް އިންކް ޕްރައިވެޓް ލިމިޓެޑާއި ހަވާލުކުރިއިރު ނ. ކުޑަފަރީ ދަނޑުގެ ސަބް ބޭސް މަސައްކަތް 1.152 މިލިއަން ރުފިޔާއަށް ހަވާލުކުރީ ވެސް އެ ކުންފުންޏާ އެވެ.

Contract signed for sub base preparation in N. Kudafaree, HDH. Nellaidhoo, HDH. Hanimaadhoo, HDH. Kulhudhuffushi and HDH. Nolhivaram football pitches. State Minister @ashadh_ali signed on behalf of the Ministry. pic.twitter.com/bOlzIjFUDQ

— Ministry of Youth,Sports and Community Empowerment (@MoYSCEmv) October 30, 2019

މި ރަސްމިއްޔާތުގައި އެ ދާއިރާއަށް ނިސްބަތްވެވަޑައިގަންނަވާ މަޖިލިސް މެމްބަރުން ވަނީ ބައިވެރިވެވަޑައިގަންނަވާފަ އެވެ. ކުޅުދުއްފުށީގައި ޓާފް އަޅައިގެން ހަދަން ނިންމާފައިވަނީ ނިމިދިޔަ ސަރުކާރުން ހަލާކޮށްލި ޒިގްޒެގް ދަނޑުގަ އެވެ.

މި އެއްބަސްވުމުގެ ދަށުން މަސައްކަތް ހަވާލުކުރާތާ 14 ދުވަހުގެ ތެރޭގައި މަސައްކަތް ފަށާ 30 ދުވަހުގެ ތެރޭގައި މަސައްކަތް ނިންމަން ޖެހެ އެވެ.

މި ދަނޑުތަކާއެކު މިއަހަރުގެ މިހާތަނަށް މިނިސްޓްރީއިން ވަނީ ޖުމްލަ 19 ދަނޑެއްގެ ސަބް ބޭސް މަސައްކަތް ހަވާލުކޮށްފައެވެ. މި ދަނޑުތަކުގެ ސަބް ބޭސް މަސައްކަތް ނިމުނުހާ އަވަހަށް ދަނޑުތަކުގައި ޓާފް އެޅުމުގެ މަސައްކަތް ފެށޭނެ ކަމަށް މިނިސްޓްރީއިން ވަނީ ބުނެފަ އެވެ.