ކޭޕީއެލް އާއި އުރީދޫގެ ކުރިމަތިލުމަކުން ކުއާޓާ ފައިނަލްގެ މެޗުތައް މިރޭ ފަށަނީ

ކުޅުދުއްފުށީގައި މިހާރު ކުރިއަށްދާ ޒިގްޒެގް އިންޓަރ އޮފީސް ފުޓްސަލް މުބާރާތުގެ ކުއާޓާ ފައިނަލަށް ދަތުރުކުރާ ޓީމުތައް ކަށަވަރުވެއްޖެ އެވެ.

ކުއާޓާ ފައިނަލްގެ މެޗުތައް މިރޭ ފަށަން ހަމަޖެހިފައިވާއިރު ކުއާޓާއަށް ދަތުރުކޮށްފައިވަނީ ކޭޕީއެލް އާއި އުރީދު، ޕޮލިސް، އައިބީއެމް، ދިރާގު، ކަސްޓަމްސް، އޭއީސީ، އަދި އެސްޓީއޯ އެވެ.

ކުއާޓާ ފައިނަލްގެ މެޗުތައް މިރޭ ފަށާނީ ވަރުގަދަ ކުރިމަތިލުމަކުން، އެއީ އެންމެ ގިނަ ޕޮއިންޓް ހޯދާފައިވާ ކޭޕީއެލްއާއި ގުރޫޕްގެ ބީގެ ދެވަނަ ޓީމުގެ ގޮތުގައި އެންމެ ގިނަ ޕޮއިންޓް ހޯދި އުރީދޫ އެވެ. 12 ޕޮއިންޓް ހޯދައިގެން ކޭޕީއެލް އުޅެނީ މުބާރާތުގެ އެންމެ ކުރީގަ އެވެ. މި މެޗު ފަށާނީ މިރޭ 8 ޖަހާއިރު އެވެ.

މިރޭގެ ދެވަނަ މެޗުގެ ގޮތުގައި ކުޅޭނީ 9 ޕޮއިންޓް ހޯދާފައިވާ ޕޮލިހާއި 6 ޕޮއިންޓާއެކު އޮތް އައިބީއެމްގެ ޓީމެވެ. ތިންވަނަ މެޗުގެ ގޮތުގައި ބައްދަލުކުރާނީ ދިރާގާއި ކަސްޓަމްސް އެވެ. ދިރާގު 9 ޕޮއިންޓާއެކު ގުރޫޕް ބީ ގެ އެއްވަނާގައި އޮތްއިރު ކަސްޓަމު ޓީމް އޮތީ ގުރޫޕްގެ ސީ ގެ ދެވަނަ ޓީމުގެ ގޮތުގައި 6 ޕޮއިންޓާއެކު އެވެ.

ފޯރިގަދަ މި މެޗުތަކުގެ އެންމެ ފަހު މެޗެއްގެ ގޮތުގައި މިރޭ ބައްދަލުކުރާނީ އޭއީސީ އާއި އެސްޓީއޯގެ ޓީމެވެ. އޭއީސީއަކީ ގުރޫޕް އޭ ގެ ދެވަނަ ޓީމެވެ. 6 ޕޮއިންޓް ލިބިފައިވާއިރު އޭއީސީގެ ޓީމަކީ ގުރޫޕް އޭ ގެ އެއްވަނަ ޓީމެވެ. ކުއާޓާ ފައިނަލްގެ މެޗުތައް މިރޭ ފަށާއިރު އެ މެޗުތައް ޒިގްޒެގް ފޭސްބުކް ޕޭޖުން ލައިވްކުރާނެ އެވެ.

ރާއްޖޭގެ ފުޓްސަލްގެ މަޝްހޫރު މޫނުތައް މި މުބާރާތުގައި ފެންނަމުންދާއިރު ކުއާޓާގެ މެޗުތަކަށް މޮޅެތި އިތުރު ކުޅުންތެރިން ދަނީ ޓީމުތަކުން ގެންނަމުންނެވެ.