އަންނަ އަހަރު އުތީމުގައި ދާރުލް އާސާރެއް ގާއިމުކުރަނީ

ތާރީހީގޮތުން ފާހަގަކުރެވޭ ހއ އުތީމުގައި ދާރުލް އާސާރެއް އަންނަ އަހަރު ތަރައްގީކުރަން ބަޖެޓްގައި ހިމަނައިފި އެވެ.

އަންނަ އަހަރަށް ލަފާކޮށް މަޖިލީހަށް ހުށަހެޅި ބަޖެޓްގައި އުތީމުގައި ދާރުލް އާސާރެއް ގާއިމުކުރުމަށް މިލިއަނަށްވުރެ ގިނަ ރުފިޔާ ވަނީ ބަޖެޓްގައި ޖަހާފަ އެވެ.

ތާރީހީގޮތުން ފާހަގަކުރެވޭ އުތީމަކީ ބޮޑުތަކުރުފާނުގެ އުފަން ފަސްގަނޑެވެ. އެރަށުގައި އެމަނިކުފާނަށް ނިސްބަތްވެޑައިގަންނަވާ މަޝްހޫރު އުތީމު ގަނޑުވަރާއި ބޮޑުތަކުރުފާނު ހަނދާނީ މަރުކަޒު ހުރެ އެވެ. މިހާރުވެސް ކޮންމެ އަހަރަކު ގިނަ ބަޔަކު އެރަށުގެ ތާރީހީ ބިނާތައް ބަލާލުމަށް އަންނަނީ ޒިޔާރާތްކުރަމުންނެވެ.

އަންނަ އަހަރުގެ ބަޖެޓްގައި އުތީމުގައި ފެނުގެ ނިޒާމު ގާއިމުކުރުމަށްވެސް ވަނީ ބަޖެޓްކޮށްފަ އެވެ. އެގޮތުން ފެނުގެ ނިޒާމު ގާއިމުކުރުމަށް ދެ މިލިއަނަށްވުރެއް ގިނަ ރުފިޔާ ވަނީ ހިމަނާފަ އެވެ.

ބޮޑުތަކުރުފާނުގެ ހަނދާނީ މަރުކަޒުގެ އަޕްގުރޭޑްކުރުމަށް 1.6 މިލިއަން ރުފިޔާ ހިމަނައިގެން މިހާރުވެސް ދަނީކުރަމުންނެވެ. އަދި ނަރުދަމާގެ މަސައްކަތްވެސް މިހާރު އަންނަނީ ކުރަމުންނެވެ.