ކުޅުދުއްފުށީ އަންހެނުން ކޮމެޓީގެ އަގުލަބިއްޔަތު މިހާރު ޕީޕީއެމްއާ ދިމާލަށް!

ކުޅުދުއްފުށީ އަންހެނުންގެ ތަރައްގީއަށް މަސައްކަތް ކުރާ ކޮމެޓީގެ މެޖޯރިޓީ ޕީޕީއެމްގެ ކޮޅަށް ޖެހިލައިފި އެވެ. އިއްޔެގެ ނަތީޖާތަކަށް ބަލާއިރު އަންހެނުން ކޮމެޓީގެ ގޮނޑިތައް ޕީޕީއެމް އަދި އެމްޑީޕީއަށް ލިބިފައިވަނީ ހަމަހަމައަށެވެ. އެއީ ކޮންމެ ޕާޓީއަކަށް 3 ގޮނޑި އެވެ.

މިއަދު އިލެކްޝަން ކޮމިޝަނުން ނެރެފައިވާ ވަގުތީ ނަތީޖާތަކަށް ބަލާއިރު މިހާރު އަންހެނުން ކޮމެޓީގެ 4 ގޮނޑި ޕީޕީއެމްއަށް ވަނީ ލިބިފައެވެ. އެމްޑީޕީއަށް ލިބުނީ 2 ގޮނޑިއެވެ. އަދިވެސް ނުގުނާ ގިނަ ފޮށިތަކެއް އުޅޭއިރު އަދިވެސް މި ނަތީޖާ ބަދަލުވުމަކީ އެކަށީގެންވާ ކަމެކެވެ.

ފަހުން ޕީޕީއެމްއަށް ލިބުނީ ކުޅުދުއްފުށީ މެދު އުތުރު ދާއިރާގެ ގޮނޑިއެވެ. މި ގޮނޑިއަށް ޕީޕީއެމްއިން ވާދަކޮށްފައިވަނީ ސަމީމާ ހަސަންއެވެ.

އޭނާ އެކު އެ ދާއިރާއަށް ވާދަކުރެއްވީ އެމްޑީޕީގެ ކެންޑިޑޭޓު އައިޝަތު އިސްމާއިލްއެވެ. ސަމީމާ މިހާރު ކުރީގައި އޮތީ 28 ވޯޓުގެ ތަފާތުންނެވެ. އިއްޔެ މި ފޮށީގެ ނަތީޖާއަށް ބަލާއިރު އެމްޑީޕީގެ ކެންޑިޑޭޓު އައިޝަތު ކުރީގައި އޮތީ 76 ވޯޓުގެ ތަފާތުންނެވެ. މިހާރުގެ ނަތީޖާއަށް ބަލާއިރު ސަމީމާއަށް ޖުލްމަ 309 ވޯޓު ލިބިފައިވާއިރު އައިޝަތަށް ލިބިފައިވަނީ 281 ވޯޓެވެ. މި ދާއިރާގައި 61 ފޮށި ގުނާފައިވައިރު ނުގުނާ 9 ފޮށި އެބަހުއްޓެވެ.

އުތުރު ދާއިރާގެ ގޮނޑި ކާމިޔާބު ކުރެއްވި ޕީޕީއެމްގެ ކެންޑިޑޭޓް ހަދީޖާ މޫސާ މިހާރު ލިބިފައިވާ ވޯޓުގެ ޖުމްލަ އަދަދަކީ 358 އެކެވެ. ހަދީޖާ މި ގޮނޑި ކާމިޔާބު ކުރެއްވީ އެމްޑީޕީން ވާދަކުރެއްވި ކެންޑިޑޭޓް ސުހާ އަބްދުﷲ އާއި ވާދަކޮށްގެން މިހާރު ލިބިފައިވާ ނަތީޖާއަށް ބަލާ 10 ވޯޓުގެ ތަފާތުންނެވެ. ސުހާއަށް ލިބިފައިވަނީ 348 ވޯޓެވެ. މި ދާއިރާގައި 54 ފޮށި ގުނާފައިވައިރު ނުގުނާ 8 ފޮށި އެބަހުއްޓެވެ.

ހުޅަނގު އުތުރު ދާއިރާއަށް ވާދަކުރެއްވި ދެ ކެންޑިޑޭޓުންނަކީ ޕީޕީއެމްގެ ކެންޑިޑޭޓު މައިމޫނާ އަބްދުﷲއާއި އެމްޑީޕީގެ ކެންޑިޑޭޓު އަކްބަރީ މުހައްމަދެވެ. މިހާރު ލިބިފައިވާ ނަތީޖާއަށް ބަލާ 186 ވޯޓުގެ ތަފާތުން މިހާރުވެސް ކުރީގައި އޮތީ އަކްބަރީ މުހައްމަދެވެ. އަކްބަރީއަށް 392 ވޯޓު ލިބިފައިވާއިރު މައިމޫނާއަށް ލިބިފައިވަނީ 206 ވޯޓެކެވެ. މި ދާއިރާގައި 37 ފޮށި ގުނާފައިވައިރު ނުގުނާ 10 ފޮށި އެބަހުއްޓެވެ.

މެދު ދެކުނު ދާއިރާއަށް ގެ ގޮނޑި ކާމިޔާބު ކުރެއްވީ ޕީޕީއެމްގެ ކެންޑިޑޭޓް އާތިފާ މުހައްމަދެވެ. އާތިފާ މި ގޮނޑި ކާމިޔާބުކުރެއްވީ އެމްޑީޕީން ވާދަކުރެއްވި ކެންޑިޑޭޓް ހަދީޖާ އަބޫބަކުރާ ވާދަކޮށްގެން މިހާރު ލިބިފައިވާ ނަތީޖާއަށް ބަލާ 24 ވޯޓުގެ ތަފާތުންނެވެ. އާތިފާއަށް ލިބިފައިވަނީ 327 ވޯޓެވެ. އަދި ހަދީޖާއަށް ލިބިފައިވަނީ 303 ވޯޓެވެ. މި ދާއިރާގައި މިހާތަނަށް ގުނާފައިވަނީ 50 ފޮއްޓެވެ. ނުގުނާ 10 އެބަހުއްޓެވެ.

ހުޅަނގު ދެކުނު ދާއިރާގެ ގޮނޑި ކާމިޔާބުކުރެއްވީ ޕީޕީއެމްގެ ކެންޑިޑޭޓު ޝާހިދާ އެވެ. 3 ކެންޑިޑޭޓުން ކުރިމަތިލި މި ދާއިރާގައި ދެން ވާދަކޮށްފައިވަނީ އެމްޑީޕީގެ ކެންޑީޑޭޓު އާތިފާ މުހައްމަދާއި އަމިއްލަ ގޮތުން ވާދަކުރެއްވި ހަބީބާ މުހައްމަދެވެ. ޝާހިދާއަށް މިހާތަނަށް 315 ވޯޓު ލިބުނުއިރު، އާތިފާއަށް ލިބިފައިވަނީ 287 ވޯޓެވެ. އަދި ހަބީބާއަށް ލިބިފައިވަނީ 56 ވޯޓެވެ.

އިރުދެކުނު ދާއިރާގައި އެމްޑީޕީގެ ކެންޑިޑޭޓު ފިރާޝާ އިބްރާހިމް މިހާރު ކުރީގައި އުޅެނީ 92 ވޯޓުގެ ތަފާތުންނެވެ. ފިރާޝާއާއި ވާދަކުރެއްވި ޕީޕީއެމްގެ ކެންޑިޑޭޓު ހަފީޒާ މުހައްމަދަށް ލިބިފައިވަނީ 271 ވޯޓެވެ. މި ދާއިރާގައިވެސް ނުގުނާ 8 ފޮށި ހުރިއިރު ގުނާފައިވަނީ 48 ފޮއްޓެވެ.