ފުރަތަމަ ސިޓީ ކައުންސިލް ހުވާކޮށްފި

ކުޅުދުއްފުށީ ސިޓީ ފުރަތަމަ މޭޔާރ އަދި ކައުންސިލަރުން މަގާމުގެ ހުވާކޮށް، އަންހެނުން ތަރައްގީއަށް މަސައްކަތްކުރާ ކޮމިޓީގެ މެންބަރުން މަގާމުގެ އިގްރާރުގައި މިއަދު ސޮއިކޮށްފި އެވެ.

މިއަދު ހެނދުނު 09:00 ޖަހާއިރު ނޮދާރން އޮފީސް ކޮމްޕްލެކްސް ހޯލުގައި މިކަމަށް ބޭއްވި ހާއްސަ ރަސްމިއްޔާތުގައި ފުރަތަމަ އޮތީ މޭޔާރ އަދި ކައުންސިލަރުން ހުވާ ކުރެއްވުމެވެ. އެގޮތުން ކައުންސިލަރުންނަށް ހުވާލައި ދެއްވީ ހދ ޖުޑީޝަލް ދާއިރާގެ އިސް މެޖިސްޓްރޭޓް އަލްއުސްތާޛް އަލީ އާދަމް އެވެ.

ކައުންސިލަރުން ހުވާ ކުރެއްވުމަށްފަހު ދެން އޮތީ އަންހެނުން ތަރައްގީއަށް މަސައްކަތްކުރާ ކޮމިޓީގެ މެންބަރުން އިގްރާރުގައި ސޮއިކުރެއްވުމެވެ.

މިއީ ކުޅުދުއްފުއްޓަށް ސިޓީއެއްގެ ދަރަޖަ ލިބުމަށްފަހު ހޮވުނު ފުރަތަމަ ސިޓީ ކައުންސިލެވެ. އެގޮތުން މިދިޔަ އޭޕްރިލްމަހު ބޭއްވި ކައުންސިލް އިންތިހާބުގައި ކުޅުދުއްފުށީ ސިޓީ ކައުންސިލްގެ ހުރިހާ ގޮޑިއެއްވެސް ކާމިޔާބުކޮށްފައިވަނީ އެމްޑިޕީ މެންބަރުންނެވެ.

ނަމަވެސް އަންހެނުން ތަރައްގީއަށް މަސައްކަތްކުރާ ކޮމެޓީގެ މެޖޯރިޓީ ހޯދީ އިދިކޮޅު ޕީޕީއެންއިންނެވެ. އެގޮތުން އެ ޕާޓީން ކޮމެޓީގެ ހަ ގޮޑި ތެރެއިން 4 ގޮޑި ވަނީ ކާމިޔާބުކޮށްފައެވެ.