ބައިސްކަލް ދުއްވުން އަލުން ދިރުވަން ޖެހޭ: ލަތީފް

ބައިސްކަލް ދުއްވުމަކީ މިހާރު ނެތެމުންދާ ކަމެއް ކަމަށާއި އެކަން އަލުން ދިރުވާ އާލާކުރަން ޖެހޭކަމަށް ކުޅުދުއްފުށީ ކައުންސިލްގެ ރައީސް އަބުދުލް ލަތީފް ހަސަން ވިދާޅުވެއްޖެ އެވެ.

ލަތީފް މިހެން ވިދާޅުވީ ބައިކް މޯލްޑިވްސްގެ ފަރާތުން މިހާރު ކުޅުދުއްފުށީގައި ކުރިއަށްގެންދާ ހަރަކާތްތަކުގެ ތެރެއިން މިއަދު ހަވީރު ބޭއްވި ބައިސްކަލް ބުރު ނިންމާލުމަށްފަހު ބައިވެރިންނާ މުހާތަބުކުރައްވާ ދެއްކެވި ވާހަކާގައި އެވެ.

ބައިސްކަލް ދުއްވުމަކީ ސިއްހީ ގޮތުންވެސް ވަރަށް މުހިންމުކަމެއްކަން ފާހަގަކުރައްވަމުން ލަތީފް ވިދާޅުވީ ވީހާވެސް ގިނަ ބަޔަކު ބައިސްކަލް ބޭނުންކުރުމަށް އެދޭކަމަށެވެ.

"ވީހާވެސް ގިނަ ބަޔަކު ސައިކަލްގެ ބަދަލުގައި ބައިސްކަލް ބޭނުންކުރާ ގޮތަށް މަސައްކަތްކޮށްދެއްވުމަކީ އަޅުގަނޑުމެންގެ އެދުމަކަށް އެބަޖެހޭ ހަދަން." ލަތީފް ވިދާޅުވި އެވެ.

އޭނާ ވިދާޅުވީ މިފަދަ ހަރަކާތްތަކެއް ބައިކް މޯލްޑިވްސްގެ ފަރާތުން މިރަށުގައި ބޭއްވިގެންދިޔުމަކީ ވަރަށް ބޮޑު ފަހުރެއްކަމަށާއި އެކަމަށްޓަކާ ލަތީފް ވަނީ ބައިކް މޯލްޑިވްސްއަށް ޝުކުރުއަދާކުރައްވާފަ އެވެ.

މިއަދު ހަވީރު ކުޅުދުއްފުށީގައި ބޭއްވި ބައިސްކަލް ބުރުގައި އެކި އުމުރުފުރާގެ ގިނަ ބަޔަކު ވަނީ ބައިވެރިވެފަ އެވެ.