މަޖިލީހުގެ ދައުރު ހަފްތާއަކަށް އިތުރު ކުރުމަށް ފާސްކޮށްފި

ރައްޔިތުންގެ މަޖިލީހުގައި މިހާރު ހިނގަމުން މިދާ މަޖިލީހުގެ 3 ވަނަ ދައުރަށް ހަފްތާްއެއް އިތުރުކުރުމަށް ފާސްކޮށްފި އެވެ.

މި ދައުރުގެ މުއްދަތު އަންނަ ޑިސެމްބަރު މަހުގެ ފަސްވަނަ ދުވަހާ ހަމައަށް އިތުރުކުރަން މަޖިލީހުން ފާސްކުރީ މިއަދުގެ ޖަލްސާގައި އެ ކަމަށް ނެގި ވޯޓުގައި ބައިވެރިވެވަޑައިގެންނެވި 32 މެމްބަރުންގެ އަގުލަބިއްޔަތުންނެވެ.

މަޖިލީހުގެ މިއަދުގެ ޖަލްސާގައި ވާހަކަފުޅު ދައްކަވަމުން މަޖިލީހުގެ ރައީސް އަދި ކުރީގެ ރައީސް މުހައްމަދު ނަޝީދު ވިދާޅުވީ މަޖިލީހުގައި މުހިއްމު ބިލްތަކާއި މަސައްކަތްތައް ހުށަހެޅިފައިވާތީވެ އެ މަސައްކަތްތައް ނިންމުމުގެ ގޮތުން މަޖިލީހުގެ ދައުރު އިތުރުކުރަން ބޭނުންވާ ކަމަށެވެ.

މަޖިލީހުގައި މިހާރު ފާސްނުކުރެވި އޮތް މަސައްކަތްތަކުގެ ތެރޭގައި އަންނަ އަހަރަށް ލަފާ ކުރާ 37.8 ބިލިއަން ރުފިޔާގެ ދައުލަތުގެ ބަޖެޓާއި، އިންކަމް ޓެކްސްގެ ބިލާއި، ގާނޫނު އަސާސީގެ ލާމަރުކަޒީ ބާބަށް އިސްލާހު ގެނައުމުގެ ބިލާއި ލާމަރުކަޒީ ގާނޫނަށް އިސްލާހު ގެނައުމުގެ ބިލް ހިމެނެ އެވެ.