ކުށް ސާބިތުވެ ޔާމިން ފަސް އަހަރަށް ޖަލަށް ލައި ފަސް މިލިއަން ޑޮލަރުން ޖޫރިމަނާކޮށްފި
ކުރީގެ ރައީސް އަބްދުﷲ ޔާމިންގެ އެމްއެމްޕީއާރްސީ މެދުވެރިކޮށް، ގއ. ވޮޑަމުލާ ދޫކޮށްގެން ދައުލަތަށް ލިބެން ޖެހޭ އެއް މިލިއަން ޑޮލަރު އަމިލަފުޅު އެކައުންޓަށް ޖަމާކޮށް އެ ފައިސާ ލޯންޑާ ކުރި ކަމުގެ ދައުވާ ސާބިތުގެ ފަސް އަހަރަށް ޖަލަށްލައި ފަސް މިލިއަން ޑޮލަރުން ޖޫރިމަނާ ކޮށްފި އެވެ.
އެގޮތުން މިއަދު ކުރިއަށް ދިޔަ ޝަރީއަތުގެ މަޖިލީހުގައި އެމްއެމްއެމްޕީއާރުސީ ހިޔާނާތުގެ ތެރެއިން ގެއްލުނު ފައިސާ ހޯދަންޖެހޭ ކަމާއި، ރައީސް ޔާމީންގެ އެކައުންޓަށް ޖުމްލަ އެއް މިލިއަން ޑޮލަރު އެސްއޯއެފްގެ ޗެކަކުން ފައިސާ ޖަމާކޮށްފައިވާކަން ފާހަގަކޮށް އެ ފައިސާއިން މަންފާ ހޯދުމަށް އެމްއައިބީގައި އޮންނަ ޖެނެރަލް އިންވެސްޓްމަންޓް އެކައުންޓަށް ޓްރާންސްފާ ކޮށްފައި، އެސްކްރޯ އެކައުންޓަށް ޖަމާކުރި ފައިސާއަކީ އެހެން ފަރާތެއް މެދުވެރިކޮށް ހޯދި ފައިސާކަމާއި، އެއީ ކުށްކޮށްގެން ހޯދާފައިވާ ފައިސާކަން ދައުވާ ލިބޭ ފަރާތަށް އެނގޭ ކަމަށް ޝަރީއަތުން ވަނީ ފާހަގަކޮށްފަ އެވެ.
މީގެ އިތުރުން އެ ފައިސާއަކީ ކެމްޕެއިން ފައިސާ ނޫންކަން ކުރީގެ ނައިބު ރައީސް އަހުމަދު އަދީބުގެ ހެކިބަހުން ވެސް އެނގޭ ކަމަށާއި އެއީ ކުށްކޮށްގެން ހޯދާފައިވާ ފައިސާކަމާއި އެ ފައިސާއަކީ ދައުލަތަށް ލިބެންޖެހޭ ފައިސާކަން އޭސީސީން ދައުވާލިބޭ ފަރާތަށް އަންގާފައިވާކަމަށް ވެސް ޝަރީއަތުން ވަނީ ފާހަގަކޮށްފަ އެވެ.
ދައުލަތުގެ ފަރާތުން ކޯޓުގައި އެދުނީ ރައީސް ޔާމީނަށް ގާނޫނުގައި އޮތް އެންމެ ކުޑަ އަދަބު ދިނުމަށެވެ. އެއީ ފަސް އަހަރުގެ ޖަލު ހުކުމެކެވެ. އަދަބާބެހޭ ގޮތުން ދިފާއުންވަނީ އެސްކްރޯ އެކައުންޓުގައި ހުރި އެއް މިލިއަން ޑޮލަރަކީ ދައުލަތަށް ލިބިފައިވާ ފައިސާކަމަށް ކަނޑައަޅައި ދެއްވައި އިތުރު ޖޫރިމަނާއެއް ކަނޑަނޭޅުންމަށް އެދިފަ އެވެ. އަދި ކުރިއަށް އޮތީ ހަފްތާ ބަންދު ކަމަށްވެފައި މިއަދު އަދަބު ކަނޑައަޅައިފިނަމަ އިސްތިއުނާފުކުރުން ފަދަ ގިނަ ހައްގުތަކެއް ގެއްލިދާކަމަށްވެސް ދިފާއުން ފާހަގަ ކުރެއްވި އެވެ.
