ބޯކޮށް ވާރޭވެހި ކުޅުދުއްފުށީގައި ފެންބޮޑުވެއްޖެ

ބޯކޮށް ވާރޭވެހި ކުޅުދުއްފުށީގެ ބައެއް ސަރަހައްދުތަކުގައި ފެންބޮޑުވެއްޖެ އެވެ. ރެއިން ފެށިގެން ހުއްޓާނުލާ މިއަދު މެންދުރާ ހަމައަށް ވާރޭ ވެހިފައިވެ އެވެ.

ފެންބޮޑުވުމުގެ ސަބަބުން ބައެއް ގޭގެއަށް ފެންވަދެ ގެއްލުން ލިބިފައިވެ އެވެ. ކައުންސިލްގެ ރައީސް އަބުދުލް ލަތީފް ހަސަން ވިދާޅުވީ ފެންބޮޑުވުމުގެ ހާދިސާ ރިޕޯޓްކުރުމަށް ކައުންސިލުން ހުޅުވާފައިވާ ހޮޓްލައިން މެދުވެރިކޮށް މިހާތަނަށް 20 ގެޔަކަށް ފެންވަދެގެން ރިޕޯޓްކޮށްފައިވާ ކަމަށެވެ.

ލަތީފް ވިދާޅުވީ މުއައްސަސާތަކާ ގުޅިގެން ފެން ހިންދުމުގެ މަސައްކަތްކުރަމުންދާ ކަމަށާ އެގޮތުން ރަށުގެ ތިން ސަރަހައްދެއްގައި ފެން ހިންދުމަށް ޕަމްޕް ސްޓޭޝަން ގާއިމުކުރެވި ފެން ހިންދުމުގެ މަސައްކަތް ކުރަމުންދާ ކަމަށެވެ.

ލަތީފް ވިދާޅުވީ ޑިޒާސްޓަރ މެނޭޖްމަންޓް އޮތޯރިޓީ އާއި ރެޑްކުރެންސެންޓް، ސިފައިން، އެސްޓީއޯ، ފުލުހުންނާއި ކައުންސިލް، ޕަބުލިކް ވޯކްސް، ކޭޕީއެލް އަދި ރަށުގައި ގާއިމުވެފައި ހުރި އެހެނިހެން މުއައްސަސާތަކުގެ އެހީތެރިކަން ލިބެމުންދާ ކަމަށެވެ.