ކުޅުދުއްފުށީގައި ފެންބޮޑުވެ 20 ގެޔަކަށް ގެއްލުންވެއްޖެ

ރެއިން ފެށިގެން ހުއްޓާނުލާ މިއަދު މެންދުރާ ހަމައަށް ކުޅުދުއްފުއްޓަށް ވިއްސާރަކޮށް ބައެއް ސަރަހައްދުތަކުގައި ފެންބޮޑުވެ، 20 ގެޔަކަށް ފެންވަދެގެން މިހާތަނަށް ރިޕޯޓްކޮށްފައިވާކަމަށް ކައުންސިލުން ބުނެފި އެވެ.

ކައުންސިލްގެ ރައީސް އަބުދުލް ލަތީފް ހަސަން ދެންމެ ކޭއޯއަށް ވިދާޅުވީ، ފެންބޮޑުވުމުގެ ހާދިސާއާ ގުޅިގެން 20 ގެޔަކަށް ފެންވަދެ ގެއްލުން ލިބިފައިވާކަމުގެ ރިޕޯޓް ކައުންސިލަށް ލިބިފައިވާ ކަމަށެވެ.

އެތަނުން ތިން ގެޔަތަކަށް ބޮޑެތި ގެއްލުން ލިބިފައިވާ ކަމަށާ އެގެތަކުގެ މީހުން އެހެން ވަގުތީ ބޯހިޔާވަހިކަމަށް ބަދަލުކުރުމުގެ މަސައްކަތް ޑިޒާސްޓަރ މެނޭޖްމަންޓާ ގުޅިގެން ކުރިއަށްގެންދާ ކަމަށް ލަތީފް ވިދާޅުވި އެވެ.

ފެންބޮޑުވުމުގެ މިހާދިސާ ރިޕޯޓްކުރުމަށް ކައުންސިލުން ވަނީ ހޮޓްލައިނެއް ގާއިމުކޮށްފަ އެވެ އެ ނަންބަރަކީ 9498547 އެވެ.

މުއައްސަސާތަކާ ގުޅިގެން ފެން ހިންދުމުގެ މަސައްކަތްކުރަމުންދާއިރު ރަށުގެ ތިން ސަރަހައްދެއްގައި ފެން ހިންދުމަށް ޕަމްޕް ސްޓޭޝަން ގާއިމުކުރެވި ފެން ހިންދުމުގެ މަސައްކަތް ދަނީކުރަމުންނެވެ.

ޑިޒާސްޓަރ މެނޭޖްމަންޓް އޮތޯރިޓީ އާއި ރެޑްކުރެންސެންޓް، ސިފައިން، އެސްޓީއޯ، ފުލުހުންނާއި ކައުންސިލް، ޕަބުލިކް ވޯކްސް، ކޭޕީއެލް އަދި ރަށުގައި ގާއިމުވެފައި ހުރި އެހެނިހެން މުއައްސަސާތަކުގެ އެހީތެރިކަން ލިބެމުންދާ ކަމަށް ކައުންސިލުން މައުލޫމާތުދެ އެވެ.