ބޯކޮށް ވާރޭވެހި ގޮއިދޫގައި ފެންބޮޑުވެ 6 ގެޔަކަށް ގެއްލުންވެއްޖެ

މިހާރު ރާއްޖެއަށް ކުރަމުންދާ ވިއްސާރާގައި ށ. ގޮއިދޫއަށް ބޯކޮށް ވާރޭވެހި އެރަށުގައި ފެންބޮޑުވެއްޖެ އެވެ. ރޭ ދަންވަރު ކުރި ވިއްސާރާގައި އެރަށުގެ 6 ގެޔަކަށް ފެންވަދެ ގެއްލުން ލިބިފައިވެ އެވެ.

މިއީ ފަހު ތާރީހެއްގައި ވިއްސާރަކޮށް އެރަށުގައި މިހާ ފެންބޮޑުވި ފުރަތަމަ ފަހަރެވެ. ގޮއިދޫ ކައުންސިލްގެ ރައީސް އިބުރާހިމް ޝާހިދު ކޭއޯއަށް ވިދާޅުވީ، ފެންބޮޑުވުމުގެ މި ހާދިސާގައި 6 ގެޔަކަށް ބޮޑެތި ގެއްލުންތައް ލިބިފައިވާ ކަމަށެވެ.

ގެއްލުން ލިބުނު 6 ގޯތީގައި މީހުން ދިރިނޫޅެވޭ ވަރަށް ފެނުގެ އަސަރުކުރިކަމަށް ޝާހިދު ވިދާޅުވި އެވެ. އޭނާ ވިދާޅުވީ، ފެންބޮޑުވި ސަރަހައްދަކީ އާންމުކޮށް ފެންބޮޑުވާ ސަރަހައްދެއް ކަމަށާ ނަމަވެސް މިއީ ފަހުގެ ތާރީހެއްގައި މިހާ ބޮޑަށް ފެންބޮޑުވި ފަހަރު ކަމަށެވެ.

އޭނާ ވިދާޅުވީ، ފެންބޮޑުވުމުގެ ސަބަބުން ރޭ ހަތަރު ޖެހީންސުރެއް ރައްޔިތުންނާއި ކައުންސިލާ ގުޅިގެން ފެންހިންދުމުގެ މަސައްކަތްކުރަމުންދާ ކަމަށެވެ. އަދި މިއަދު ހެނދުނު 9 ޖަހާއެއާއިރު ސިފައިން އެރަށަށް އައިސް ފެންހިންދުމުގެ މަސައްކަތް އެފަރާތުންވެސް ފަށާފައިވާ ކަމަށް ޝާހިދު ވިދާޅުވި އެވެ.

ޝާހިދު ވިދާޅުވީ ފެންބޮޑުވި ހާދިސާގައި ގެތަކަށް ލިބުނު ގެއްލުން ބަލައި އެ މައުލޫމާތުތައް ޑިޒާސްޓަރއަށް ހުށައަޅާނެ ކަމަށެވެ. މިހާދިސާގައި ފެނުގެ އަސަރު އެންމެ ބޮޑަށް ލިބުނު 6 ގޭބިސީއަށް ވަނީ ބޮޑެތި ގެއްލުންތައް ލިބިފައި އެވެ. އެގޮތުން ހިފާ ގެންގުޅޭ ބައެއް ސާމާނާއި އަލަމާރި، ކަބަޑު، އެނދު ފަދަތަކެއްޗަށް ވަނީ ގެއްލުން ލިބިފަ އެވެ.

ރާއްޖެއަށް މިހާރު ކުރަމުންދާ ވިއްސާރާގައި އުތުރުގެ ބައެއް ރަށްރަށަށް ބޯކޮށް ވާރޭވެހި ފެންބޮޑުވުމުގެ ހާދިސާތައް އަންނަނީ ހިންގަމުންނެވެ.