ކުޅުދުއްފުށީގައި ސިޓީ ކައުންސިލެއް އިންތިހާބު ކުރުމުގެ މަސައްކަތް ފަށައިފިން: އީސީ

މާދަމާ އިން ފެށިގެން ކުޅުދުއްފުއްޓަށް ސިޓީއެއްގެ ދަރަޖަ ދޭން ރައީސް އިބްރާހިމް މުހައްމަދު ސޯލިހް ނިންމުމާއި ގުޅިގެން ކުޅުދުއްފުއްޓަށް ސިޓީ ކައުންސިލެއް އިންތިހާބު ކުރުމުގެ މަސައްކަތް ފަށާފައިވާ ކަމަށް އިލެކްޝަންސް ކޮމިޝަން (އީސީ) ން މިއަދު ބުނެފި އެވެ.

އެ ކޮމިޝަނުން ކުރި ޓްވިޓެއްގައި ބުނެފައިވަނީ ކުޅުދުއްފުށީގައި ދެން އިންތިހާބު ކުރާނީ ސިޓީ ކައުންސިލެއް ކަމަށެވެ.

HD.Kulhudhuhfuttaki city ehge gothugai Raeesul jumuhooriyya kanda elhuvvumaa gulhigen, qaanoonugaivaa gothuge mathin kulhudhuhfisheegai city council eh inthikhaabu kurumuge masahkaiy fashaifin.

— Elections Commission (@ElectionsMv) December 31, 2019

ކުޅުދުއްފުށީގެ އިންތިހާބު ދެން ކުރިއަށް ގެންދަން ޖެހޭނީ ދާއިރާތަކަކަށް ބަހައިގެން ކަމަށާއި އެ މަސައްކަތްތައް އިލެކްޝަންސް ކޮމިޝަނުން މިހާރު ފަށާފައި ވާއިރު ލަސްނުވެ ދާއިރާތައް ކަނޑައަޅާނެކަމަށް އެކޮމިޝަނުން މައުލޫމާތު ދެއެވެ.

ސިޓީއެއްގެ ދަރަޖަ ލިބުމާ އެކު ތަފާތަކީ ކުޅުދުއްފުށީގައި ވެސް މޭޔަރަކު އިންތިހާބު ކުރަން ޖެހުމެވެ. އެ ކައުންސިލްގައި ދެން ހިމެނިވަޑައިގަންނަވާނީ މޭޔަރަކާއި އަންހެން ދެ ކައުންސިލަރުންނާ އެކު ޖުމްލަ ހަތް ބޭފުޅުންނެވެ. ކުރިން ވެސް ކައުންސިލްގައި ތިއްބެވީ ހަތް މެމްބަރުންނެވެ.

ކުޅުދުއްފުށީގެ އިތުރުން ރާއްޖޭގެ ސިޓީ ތަކަކީ މާލެ އާއި އައްޑޫ އަދި ފުވައްމުލަކެވެ.