ޝިދާތާ، ޓީޗަރުންނަށް: ހެޔޮ ތަރުބިއްޔަތާއެކު ބޮޑެތިވާ ދަރިވަރުންތަކެއް އުފައްދައިދީ

ފޮތުގައި ލިޔެފައި ހުންނަ މުގައްރަރަށް އެކަނި ކިޔަވައިދިނުމުގެ އިތުރުން ދަރިވަރުންނަށް ހެޔޮ ތަރުބިއްޔަތެއް ދިނުމަށް ހުރިހާ ޓީޗަރުންނަށް ޖެންޑަރ މިނިސްޓަރު ޝިދާތާ ޝަރީފް ނަސޭހަތްތެރިވެއްޖެ އެވެ.

ދިރާސީ އާ އަހަރު ފެށުމުގެ ގޮތުން މިއަދު އަފީފުއްދީން ސްކޫލުގައި އޮތް ހދ އަތޮޅުގެ ހާއްސަ އެސެމްބުލީ ޝަރަފްވެރިކޮށްދެއްވާ ވާހަކަދައްކަވަމުން މިނިސްޓަރު ޝިދާތާ ވިދާޅުވީ، ތައުލީމީ މުގައްރަރުގައި ހުންނަ ތަކެތި ވަރަށް ފުރިހަމައަށް ދަރިވަރުންނަށް ދަސްކޮށްދެވިދާނެ ކަމަށާއި އެކަމަކު މުގައްރަރު އެކަނި ދަރިވަރުންނަށް ކިޔަވައިދީގެން އޭގެ ނަތީޖާ މުޖުތަމައުއަށް ފެންނަވަރު ކުޑަކަމަށެވެ.

މުގައްރަރުގެ އިތުރުން ރަނގަޅު ތަރުބިއްޔަތަކާއި ރަނގަޅު ވިސްނުމާއެކު ބޮޑުވާ ދަރިންތަކެއް ތަރުބިއްޔަތުކޮށްދެއްވުމަށް ޓީޗަރުންގެ ކިބައިން ޝިދާތާ އެދިވަޑައިގެންނެވި އެވެ.

"ވަރަށް މޮޅަށްވެސް މުގައްރަރު ކިޔަވައިދެވިދާނެ، އެކަމަކު އޭގެ ނަތީޖާ މުޖުތަމައަށް ފެންނަވަރު ވަރަށް ކުޑަވާނެ. އެހެންނަމަވެސް ސްކޫލުން ހެޔޮ ތަރުބިއްޔަތެއް ލިބިގެން މުޖުތަމައުއަށް ނިކުންނަށް ދަރިއެއްގެ އަސަރު މުޖުތަމައުއަށް މާ މުހިންމުވާނެ." ކުޅުދުއްފުށީގައި ހުންނަވައިގެން މިނިސްޓަރު ވިދާޅުވި އެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރު ޝިދާތާ ވިދާޅުވީ ދަރިވަރުން ޓީޗަރުންނަށް އިހްތިރާމްކުރަން ޖެހޭނެ އެވެ. އެއީ ސުވާލެއް އޮތް ކަމެއް ނޫންކަމަށެވެ. އަދި ހަމަ އެގޮތަށް ޓީޗަރުންވެސް ދަރިވަރުންނަށް އިހްތިރާމް ކުރަން ޖެހޭނެކަން އެކަމަނާ ފާހަގަކުރެއްވި އެވެ.

"އެ އިހްތިރާމް އަދާކުރުމަކީ އެކުދިން ދައްކާ ވާހަކަތައް އަޑުއެހުން، ކުދިންގެ ހިޔާލުތަކަށް އިހްތިރާމްވެސް ކުރުން، އަދި އަޅުގަނޑުމެން ކަންކަން ނިންމާއިރުގައި ކުދިންގެ ބައިވެރިވުންވެސް އޮތުން." މިނިސްޓަރު ވިދާޅުވި އެވެ.

އެކި ސްކޫލުތަކުގައި ދައުލަތުގެ ވަޒީރުން ވަޑައިގެން އެސެމްބުލީތަކުގައި ވާހަކަދެއްކުމަކީ އާންމުކޮށް ކުރާކަމެއް ނޫންކަން ފާހަގަކުރައްވަމުން ޝިދާތާ ވިދާޅުވީ، މިކަމުން އެނގިގެންދަނީ ސަރުކާރަށް، ދަރިވަރުންނާއި ސްކޫލުތައް މުހިންމުވާ ކަން ކަމުގައި އެވެ.

އަދި ސަރުކާރުން އެ މުހިންމުކަން ސާބިތުކޮށްދޭނީ ޕޯޑިއަމްތަކުން މިހެން ދައްކާ ވާހަކައަކުން ނޫން ކަމަށާ ސްކޫލްތަކަށް ހޯދައިދޭ ވަސީލަތްތަކުން ކަމަށެވެ. ހަމައެއާއެކު ދަރިވަރުންނާއި ޓީޗަރުން އަދި ސްކޫލަށް ހޯދައިދޭ ފަހި ފުރުސަތަކުންކަމަށް މިނިސްޓަރު ވިދާޅުވި އެވެ.

އެކަމަނާ ވިދާޅުވީ ފާއިތުވެގެން މިދިޔަ އަހަރަކީ ވަރަށް ބޮޑު ތަފާތުތަކެއް މުޅި ތައުލީމީ މާހައުލަށް ގެނެވިގެން ދިޔަ އަހަރެއް ކަމަށާ ކުރިއަށް އޮތް އަހަރުތަކުގެ ތެރޭގައި އިންގިލާބީ ބަދަލުތަކެއް ފެނިގެންދާނެކަމުގެ އަޒުމުގައި ތިބި ކަމަށެވެ.

އަދި ހާއްސަ އެހީއަށް ބޭނުންވާ ކުދިންނަށް އެކި ފަންގިފިލާތަކަށް އެރޭނެ ގޮތަކަށް ސްކޫލު ފަރުމާކުރުމުގެ މުހިންމުކަމުގެ ވާހަކައަށް އަލިއަޅުވާ ވާހަކަދައްކަވަމުން ޝިދާތާ ވިދާޅުވީ، ސަރުކާރުގެ ސިޔާސަތުތައް ހުރީ އެކަން ކުދިންނަށް ފަހިކުރުމަށް ކަމަށެވެ. އަދި އެ އެ ހައްގު ހޯދައިދިނުމަށްޓަކާ ބަދަލުތަކެއް ގެންނާނެކަމަށް މިނިސްޓަރު ވިދާޅުވި އެވެ.

މިނިސްޓަރު ޝިދާތާ ވަނީ އަފީފުއްދީން ސްކޫލުގެ ނާސްތާ ޕްރޮގުރާމްގައި ދަރިވަރުންނާއެކު ބައިވެރިވެ ނާސްތާ ފަރިއްކުޅުވާފަ އެވެ.