ފައިނުން ގޮނޑުދޮށް ގިރައި ވެއްޓުނު ގަސްތައް ސަލާމަތް ކުރަނީ

ރ. ފައިނު ގޮނޑުދޮށް ގިރުމުގެ ސަބަބުން ގޮނޑުދޮށުން ވެއްޓުނު ގަސްތައް ސަލާމަތްކުރުމުގެ މަސައްކަތް ފަށައިފި އެވެ.

"ސަން" މައުލޫމާތު ދެމުން އެރަށު ކައުންސިލްގެ ރައީސް އިބްރާހިމް ނަސީރު ވިދާޅުވީ އެރަށުގެ އަތިރިމަތި ގިރައިގެން ވެއްޓުނު ގަސްތައް ސަލާމަތްކުރުމަށް ވަގުތީ ގޮތުން ކުރަންޖެހޭ މަސައްކަތް މިހާރު ފަށައިފައިވާ ކަމަށެވެ.

ރައީސް ވިދާޅުވީ ވެއްޓުނު ގަސްތަކު ސަރަހަށްދުގެ ވަށައިގެން 20-15 ފޫޓަށް ވެލި އަޅައި ބީޗް ހެދުމުގެ މަސައްކަތް މިހާރު ކުރަމުން ދާކަމަށެވެ.

އެ ރަށް އާދަޔާ ހިލާފަށް ގިރުމުގެ ސަބަބުން ގޮނޑުދޮށުގައި ހުރި 200 އަހަރަށްވުރެ ގިނަ ދުވަސްވީ ގަސްތައް ވެސް ވަނީ ވެއްޓިފަ އެެވެ. އަދި ކައުންސިލުން ބުނެފައިވާ ގޮތުގައި ރަށް ގިރުމުގެ ސަބަބުން އެ ރަށުގެ މަލަމަތީގެ ރީތިކަން އެކީހެން ވަނީ ގެއްލިފަ ކަމަށާއި ރަށުގެ އުތުރު ފަރާތުގައި ހުރި ބިޔަ ގަސްތައް ވެއްޓިފައިވާއިރު ގިރަމުންދާ ވެލިތައް އަރަނީ ހުޅަނގުފަރާތު ތުނޑިއަށް ކަމަށެވެ.

ފައިނު ހިމެނޭ ދާއިރާ މަޖިލިސް މެންބަރު މުހައްމަދު ވަހީދު (ވައްޑެ) ވިދާޅުވެފައި ވަނީ ކުޑަރަށަކަށްވީތީ ތަފާތުނުކޮށް މައްސަލައަށް ހައްލެއް ހޯދުމަށް ސަރުކާރުން ފިޔަވަޅު އެޅުއްވީތީ ރައީސް އިބްރާހިމް މުހައްމަދު ސޯލިހުއަށް ޝުކުރު އަދާކުރައްވާ ކަމަށެވެ.

ރ.ފައިނު އާދަޔާޚިލާފަށް ގިރަމުން ދިޔަ މައްސަލަ ހައްލުކުރުމުގެ މަސައްކަތް ސަރުކާރުން ފައްޓަވައިފި. ކުޑަރަށަކަށްވީތީ ތަފާތުނުކޮށް މިފަދަ ކަންކަމުގެ ހައްލަށް ރައީސް @ibusolih ކުރައްވާ މަސައްކަތްޕުޅަށް ފަށްފަށުން ޝުކުރިއްޔާ! pic.twitter.com/cquC4mQp4Q

— Waddey (@waddey_) February 1, 2020

ތިމާވެށީގެ ތަޖުރިބާކާރުން ލަފާކުރައްވާ ގޮތުގައި މީހުން އުޅޭ ރަށްރަށް އާދަޔާ ހިލާފަށް ގިރަނީ ރަށުގެ ވަށައިގެން ގުދުރަތީ ގޮތުން ވެލި ދައުރުވާ ގޮތް ރަނގަޅަށް ދިރާސާނުކޮށް ބަނދަރާއި ޖެޓީ ހަދަމުން އަންނާތީ އެވެ. އަދި ތިމާވެއްޓަށް އަންނަ ބަދަލުތަކުގެ ސަބަބުން ރަށުގެ ވަށައިގެން ދައުރުވާ ވެލި މަދުވެ ތޮބީއަތް ބަދަލުވުމަކީ ވެސް އޭގެ ސަބަބެއް ކަމަށް ތަޖުރިބާކާރުން ބުނެ އެވެ. މީގެ އިތުރުން ގޮނޑުދޮށުން ވެލިނެގުމާއި މޫސުމީ އެހެނިހެން ބަދަލުތަކަކީ ވެސް ސަބަބެކެވެ.

އެ މައްސަލައާ ގުޅިގެން މަޖިލީހުގެ އެންވަޔަރުމަންޓް އެންޑް ކްލައިމަޓް ޗޭންޖް ކޮމިޓީގައި ރައީސް ނަޝީދު ވިދާޅުވެފައި ވަނީ ރަށްތައް މިހާރު ގިރަމުން އަންނަލެއް ބޮޑުކަމުން އެކަމުގައި ސަރުކާރަށް ވެސް ކޮށްދެވޭނެ މާބޮޑު ކަމެއް ނޯންނާނެ ކަމަށެވެ.