ނޮޅިވަރަންފަރަށް ބަދަލުކޮށް ބޯހިޔާވަހިކަން ނުދެވި ހުރި އާއިލާތަކަށް މިއަހަރު ބޯހިޔާވަހިކަން ފޯރުކޮށްދެވޭނެ

އެއްފަސް ކުރުމުގެ ސިޔާސަތުގެ ދަށުން 2011 ވަނަ އަހަރު ހދ ނޮޅިވަރަންފަރަށް ބަދަލުކުރި އެއަތޮޅުގެ ތިން ރަށެއްގެ ރައްޔިތުންނަށް މިއަހަރު ދާއިމީ ބޯހިޔާވަހިކަމެއް ލިބޭނެކަމަށް ރައީސުލް ޖުމްހޫރިއްޔާ ވިދާޅުވެއްޖެ އެވެ.

ރައީސް މިކަން ހާމަކޮށްދެއްވީ މިއަހަރަށް ރައްޔިތުން މަޖިލިސް ހުޅުވައިދެއްވުމަށް އިއްވި ރިޔާސީ ބަޔާނުގައި އެވެ.

2011 ވަނަ އަހަރު ނޮޅިވަރަންފަރަށް ބަދަލުކުރީ އެއަތޮޅު މާވައިދޫ، ފަރިދޫ އަދި ކުނބުރުދޫ ރައްޔިތުންނެވެ. މިއަދާ ހަމައަށް އައިރުވެސް އެ ރައްޔިތުންގެ ތެރެއިން ދާއިމީ ބޯހިޔާވަހިކަން ނުލިބި 53 އާއިލާ އެބަތިއްބެވެ.

ރިޔާސީ ބަޔާން އިއްވަވަމުން ރައީސް ވިދާޅުވީ، 2011 ވަނަ އަހަރު ނޮޅިވަރަންފަރަށް ބަދަލުކުރި އާއިލާތަކުގެ ތެރެއިން ދާއިމީ ބޯހިޔާވަހިކަން ނުލިބިވާ އާއިލާތަކަށް ބޭނުންވާ 60 ހައުންސިންގ ޔުނިޓް އެޅުމުގެ މަސައްކަތް ނިންމާ، މިއަހަރުތެރޭގައި އެތަންތަނާފައި ދިރިއުޅެން ފެށޭވަރުވާނެ ކަމަށެވެ.

އެއްފަސް ކުރުމުގެ ސިޔާސަތުގެ ދަށުން 2011 ވަނަ އަހަރު ނޮޅިވަރަންފަރަށް އެ ތިން ރަށުން 181 އާއިލާއެއް ވަނީ ބަދަލުކޮށްފަ އެވެ.