ގައުމީ ޓީމަށް ފަސް އަހަރު ކުޅުނު ކުޅުންތެރިންނަށް ލޯން ސްކީމެއް

ގައުމީ ޓީމަކަށް މަދުވެގެން 5 އަހަރު ކުޅެފައިވާ ކުޅުންތެރިން ރިޓަޔަރކުރުމުން ދިރިއުޅުމަށްޓަކައި އެހެން މަސައްކަތެއް ފެށުމަށް އެހީތެރިވެދިނުމުގެ ގޮތުން، މިއަހަރުގެ ތެރޭގައި ލޯން ސްކީމެއް ތައާރަފުކުރުމުގެ މަސައްކަތް ކުރަމުން އަންނަ ކަމަށް ރައީސުލްޖުމްހޫރިޔާ އިބްރާހިމް މުހައްމަދު ސޯލިހު ވިދާޅުވެއްޖެ އެވެ.

ރައްޔިތުން މަޖިލީސް މިއަހަރަށް ހުޅުއްވައިދެއްވަމުން ރައީސުލް ޖުމްހޫރިއްޔާ އިއްވި ރިޔާސީ ބަޔާނުގައި ވިދާޅުވީ، ގައުމީ ޓީމަކަށް މަދުވެގެން 5 އަހަރު ކުޅެފައިވާ ކުޅުންތެރިން ރިޓަޔަރކުރުމުން، ދިރިއުޅުމަށްޓަކައި އެހެން މަސައްކަތެއް ފެށުމަށް އެހީތެރިވެދިނުމުގެ ގޮތުން މިއަހަރުގެ ތެރޭގައި ލޯން ސްކީމެއް ތައާރަފުކުރުމުގެ މަސައްކަތް ކުރަމުން އަންނަކަމަށާއި ގައުމީ ޓީމުތަކުގެ ކުޅުންތެރިންނަށް ދިމާވާ ކުޅިވަރުގެ އަނިޔާތަކަށް ފަރުވާދެވޭނެ އިންޝުއަރެންސް ސްކީމެއް ތައާރަފުކޮށް މިއަހަރުގެ ތެރޭގައި ހިދުމަތް ލިބެން ފަށާނެ ކަމަށެވެ.

ރައީސް ވިދާޅުވީ ނިމިގެން މިދިޔަ އަހަރަކީ ރާއްޖޭގެ ކުޅިވަރުގެ ތާރީހުގައި ވަރަށް ކާމިޔާބު އަހަރެއް ކަމާއި ދިވެހި އެތުލީޓުން ވާދަކުރި ބައިނަލްއަގްވާމީ މުބާރާތްތަކުން ޖުމްލަ 46 މެޑެލް ރާއްޖެއަށް ލިބިފައިވާ ކަމަށެވެ.

އެގޮތުން ސައުތު އޭޝިއަން ގޭމްސްގެ 100 މީޓަރު ދުވުމުން މިދިޔަ އަހަރު ރާއްޖެއަށް ލިބުނު ރަންމެޑެލް އަކީ އެކުޅިވަރުން މުބާރާތުގެ ތާރީހުގައި ރާއްޖެއަށް ލިބުނު ފުރަތަމަ މެޑަލް އެވެ. މީގެ އިތުރުން އިތުރު 12 ރަން މެޑެލް ވަނީ ބައިނަލްއަގުވާމީ މުބާރާތް ތަކުން ލިބިފަ އެވެ.

ރައީސް ފާހަގަ ކުރެއްވި ގޮތުގައި މިދިޔަ އަހަރަކީ ރާއްޖޭގެ ކުޅިވަރުގެ ތާރީހުގައި ވަރަށް ކާމިޔާބު އަހަރެއް ކަމަށާއި 2023 ވަނަ އަހަރުގެ އިންޑިއަން އޯޝަން އައިލެންޑް ގޭމްސް ރާއްޖޭގައި ބޭއްވުމަށް ބޭނުންވާ އުމްރާނީ އަދި އެހެނިހެން ވަސީލަތްތައް ތަރައްގީކުރުމުގެ މަސައްކަތް މިހާރު ފެށިފައި ވާކަމަށެވެ.

ބައިނަލްއަގްވާމީ ފެންވަރަށް ކުޅުންތެރިން ބިނާކުރުމުގެ ސިޔާސަތުގެ ދަށުން ކުޅިވަރުގެ ހުނަރު ހޯދޭނެ ގޮތަށް ރާއްޖޭން ބޭރުން ކިޔެވުމުގެ ފުރުސަތު ހޯދައިދިނުމަށް ސަރުކާރުން ނިންމާފައިވާ ކަމަށްވެސް އެމަނިކުފާނު ވިދާޅުވި އެވެ.