ކޮރޯނާވައިރަހުން ރަނގަޅުވާ މީހުންގެ ރޭޓް މަތި

ޗައިނާއިން އުފަންވެގެން ދުނިޔޭގެ އެކި ގައުމުތަކުގައި ފެތުރެމުންދާ ކޮރޯނާވައިރަސް ޖެހިގެން ހާލު ދެރަވެގެން ފަރުވާ ދޭ މީހުންގެ ތެރޭން މަރުވާ މީހުންނަށް ވުރެން ބަލިން ރަނގަޅުވާ މީހުންގެ ރޭޓް މަތި ކަމަށް ތަފާސް ހިސާބުތަކުން ދައްކައިފި އެވެ.

ޗައިނާ ސަރުކާރުން ބުނީ މި މަހުގެ ދެވަނަ ދުވަހާ ހަމައަށް 14،380 މީހުންނަށް ކޮރޯނާވައިރަސް ޖެހިފައިވާ ކަމަށެވެ. އޭގެ ތެރޭން ހާލު ސީރިއަސް ކަމަށް ބުނެފައި ވަނީ 2،110 މީހުންނެވެ. ބަލީގައި މަރުވެފައި ވަނީ 305 މީހުންނެވެ. ރަނގަޅުވި ކަމަށް ރިޕޯޓްކޮށްފައި ވަނީ 328 މީހުންނެވެ.

ކޮރޯނާވައިރަސް ޖެހިފައިވާ މީހުން ފަރާތުން ހުން އައުމާއި ކެއްސުމާއި ނޭވާލުމުގައި ދަތިކަމެއް ދިމާވުން ކަހަލަ އާދައިގެ އަލާމާތްތަކެއް ފެންނަމުންދާ ކަމަށް ތަޖްރިބާކާރުން ބުނެ އެވެ. އަދި ކޮރޯނާވައިރަސްގެ ނުރައްކާ ބޮޑީ އުމުރުން ދުވަސްވީ މީހުންނާއި ހަކުރު ބަލި، ކެންސަރު އަދި ދިފާއީ ނިޒާމް ބަލިކަށި މީހުންނަށެވެ.

ވައިރަސްގެ އަލާމާތްތަކުން މުޅިން ރަނގަޅުވާން ހަފުތާއެއްހާ ދުވަސް ނަގާނެ ކަމަ ޗައިނާގެ ނޭޝަނަލް ހެލްތު ކޮމިޝަނުގެ ތަޖުރިބާކާރުން ވިދާޅުވެ އެވެ.