މިނިމަމް ވޭޖް ކަނޑައަޅަން ގާނޫނަށް އިސްލާހު ހުށަހަޅައިފި

ޚަދީޖާ އާދަމް

Feb 9, 2020

މިނިމަމް ވޭޖް ކަނޑައަޅަން، ގެންނަން ޖެހޭ ބަދަލުތައް ގެނައުމަށް ވަޒީފާއާ ބެހޭ ގާނޫނަށް އިސްލާހު ހުށަހަޅައި، މާދަމާގެ މަޖިލީހުގައި އެ ބިލުގެ ފުރަތަމަ ކިޔުން އިއްވަން ތާވަލުކޮށްފި އެވެ.

ވަޒީފާއާ ބެހޭ ގާނޫނަށް އިސްލާހު ހުށަހެޅުއްވީ ކެނދިކުޅުދޫ ދާއިރާގެ މެމްބަރު އަހުމަދު އީސާ އެވެ. މިނިމަމް ވޭޖް ކަނޑައެޅުމަކީ މި ސަރުކާރުގެ ރިޔާސީ ވައުދެވެސް މެއެވެ.

މިނިމަމް ވޭޖާ ގުޅިގެން ވަޒީފާއާ ބެހޭ ގާނޫނަށް ހުށަހެޅި އިސްލާހުތަކުގެ ތަފްސީލެއް ލިބޭނީ މާދަމާ ބިލުގެ ފުރަތަމަ ކިޔުން އިއްވުމުންނެވެ.

އުޖޫރައާ ގުޅޭ ގޮތުން ލަފާދޭ ބޯޑެއް މިހާރުވެސް އޮވެ އެވެ، އެއީ ވަޒީފާއާ ބެހޭ ގާނޫނުގެ 56 ވަނަ މާއްދާގެ (ހ) ގެ ދަށުން އެކުލަވާލާފައިވާ ބޯޑެކެވެ. އެ ބޯޑު އެކުލެވިގެންވަނީ ރައީސުލްޖުމްހޫރިއްޔާ ކަނޑައަޅާ ފަސް މެމްބަރެއްގެ މައްޗަށެވެ.

އެ ބޯޑުން މިހާރު ވަނީ ދިރާސާ ރިޕޯޓެއް ތައްޔާރުކޮށް ރައީސަށް އަރުވާފަ އެވެ. އިކޮނޮމިކް މިނިސްޓަރު ފައްޔާޒު އިސްމާއިލްވެސް ވިދާޅުވެފައިވަނީ މިނިމަން ވޭޖް ކަނޑައެޅުމުން އިގްތިސާދަށް ލޮޅުމެއް އަންނާނެ ކަމަށާއި އެހެން ނަމަވެސް ސަރުކާރުން އެކަން ކުރާނެ ކަމަށެވެ.

މިހާރު ގާނޫނުގައި ބުނެފައިވާ ގޮތުން އެންމެ ކުޑަ އުޖޫރަ ކަނޑައަޅާއިރު މުވައްޒަފަކަށް ގަޑިއަކަށް ޖެހޭނެ އަދަދާއި މަސައްކަތުގެ ބަޔަކަށް ޖެހޭނެ އަދަދާއި އަދި އިތުރު ގަޑީގައި ލިބޭނެ މިންވަރުވެސް ކަނޑައެޅި ދާނެ އެވެ.

ވަޒީފާއާ ބެހޭ ގާނޫނުގައި ބުނެފައިވާގޮތުން އެންމެ ކުޑަމިނުން ދޭން ޖެހޭ އުޖޫރައެއް ދިނުމަށް މިނިސްޓަރު އަމުރުކޮށް ނުދީފި ނަމަ ވަޒީފާ ދޭ ފަރާތް ޖޫރިމަނާވެސް ކުރެވެ އެވެ.

މިލިޔުމާއި ގުޅޭ