ފުރާވަރު ކޭމްޕް ކާމިޔާބުކަމާއެކު ނިންމާލައިފި

ކުޅުދުއްފުށީ، ޖަލާލުއްދީން ސްކޫލުގެ ދަރިވަރުންނަށް އަމާޒުކޮށްގެން ފުލުހުން ކުރިއަށްގެންދިޔަ ފުރާވަރު ކޭމްޕް ކާމިޔާބުކަމާއެކު ނިންމާލައިފި އެވެ.

ފުލުހުންގެ އަމާވެށި ޕްރޮގުރާމުގެ ދަށުން ކުރިއަށްގެންދިޔަ ފުރާވަރު ކޭމްޕްގައި އެ ސްކޫލުގެ ގުރޭޑް 10 އަދި 11 އިން 93 ދަރިވަރުން ބައިވެރިވެ ސެޓްފިކެޓް ހާސިލުކޮށްފައިވެ އެވެ.

މިދިޔަ ބުރާސްފަތި ދުވަހު ކުރިއަށްގެންދިޔަ މި ކޭމްޕު ނިންމާލުމުގެ ގޮތުން މިއަދު ހދ އަތޮޅު ތައުލީމީ މަރުކަޒުގައި ބޭއްވި ރަސްމިއްޔާތު ޝަރަފުވެރިކޮށްދެއްވީ ޗީފް ސްޕުރިންޑެންޓް އޮފް ޕޮލިސް އާސިމް އަބުދުﷲ އެވެ.

މި ރަސްމިއްޔާތުގައި ވާހަކަދައްކަވަމުން އާސިމް ވިދާޅުވީ، ކޭމްޕުން ބައިވެރިވެރިންނަށް ގިނަ ކަންތައްތަކެއް ދަސްވެފައިވާނެ ކަމަށެވެ. ކޭމްޕުން ދަސްވި ތަކެތި ދިރިއުޅުމުގެ ތެރޭގައި އެންމެ ހެޔޮގޮތުގައި ބޭނުން ހިފުމަށް އެދިލެއްވި އެވެ.

މި ރަސްމިއްޔާތުގައި މިސަރަހައްދަށް ކަނޑައަޅާފައި ހުންނަ ފުލުހުންގެ ވެރިންނާއި ސްކޫލުތަކުގެ ވެރިންނާއި ކުޅުދުއްފުށީގައި ގާއިމުކުރެވިފައި ހުރި ގިނަ މުވައްސަސާތަކެއްގެ ވެރިން ވަނީ ބައިވެރިވެފަ އެވެ.