ކުޅުދުއްފުށީ ރީޖަނަލް ހޮސްޕިޓަލުގައި ސްޕީޗް ތެރަޕީގެ ހިދުމަތް ފަށަނީ

ކުޅުދުއްފުށީ ރީޖަނަލް ހޮސްޕިޓަލުގައި ސްޕީޗް ތެރެޕީ ހިދުމަތް ފަށަން ތައްޔާރުވެއްޖެ އެވެ. މި ހިދުމަތް މިމަހު ފުރަތަމަ ދުވަހުން ފެށިގެން ދޭން ފަށައިފައިވީނަމަވެސް ރަސްމީކޮށް މި ހިދުމަތް ފެށުމަށް ހަމަޖެހިފައިވަނީ މިމަހު 7 ވަނަ ދުވަހު އެވެ.

ކޭއޯއަށް މައުލޫމާތު ދެމުން ހޮސްޕިޓަލްގެ މެނޭޖަރު އަހުމަދު ދާއޫދު ވިދާޅުވީ އެ ހިދުމަތް މިމަހު 1 ވަނަ ދުވަހުން ފެށިގެން ދެމުންދާކަމަށާއި ނަމަވެސް އެޕޮއެންޓްމެން ހައްދައިގެން ރަސްމީކޮށް ހިދުމަތް ފެށިގެން ދާނީ މި މަހު 7 ވަނަ ދުވަހުކަމަށެވެ.

އަހުމަދު ވިދާޅުވީ މި ހިދުމަތް ފެށުމާއެކު ރައްޔިތުންގެ ޖީބަށް ބޮޑު ލުއެއް ލިބިގެންދާނެކަމަށާއި ކުރިން މި ހިދުމަތް ހޯދުމަށް ދާން ޖެހެނީ މާލެކަމަށެވެ. އަދި މި ހިދުމަތަކީ ވަރަށް ގިނަ ދުވަސް ވަންދެން މަޑުކޮށްގެން ހޯދާ ހިދުމަތެއް ކަމުން މި ހިދުމަތް ކޭއާރުއެޗް ފެށުމާއެކު މި ރަށުގެ ރައްޔިތުންނަށާއި ހޮސްޕިޓަލުން ހޯދާ އެެހެން ރަށްތަކުގެ ރައްޔިތުން ވަރަށް ބޮޑު ލުއި ފަސޭހައެއް ލިބިގެން ދާނެކަމަށްވެސް ވިދާޅުވި އެވެ.

ސްޕީޗް ތެރަޕީގެ ހިދުމަތް ހަފްތާއަކު 6 ދުވަހު ލިބިގެން ދާނެކަމަށް އޭނާ ވިދާޅުވި އެވެ. މީގެ އިތުރުން އެ ހޮސްޕިޓަލުން އީއީޖީ ގެ ހިދުމަތް ވެސް ފެށުމަށް މަސައްކަތް ކުރަމުންދާކަމަށާއި މި ހިދުމަތާއެކު ނިއުރޮލޮޖީގެ ހިދުމަތް އިތުރަށްފުޅާ ވެގެން ދާނެކަމަށް އަހުމަދު ވިދާޅުވި އެވެ.