ކުރެއްދޫއާއި ވ. ތިނަދޫއަށް އަރައި ފޭބުން މަނާކޮށްފި

ކުރެއްދޫ އައިލެންޑް ރިސޯޓާއި ވ. ތިނަދޫއަށް އަރައި ފޭބުން މަނާކޮށްފި އެވެ.

ކުރެއްދޫ އައިލެންޑް ރިސޯޓަށް އަރައި ފޭބުން މަނާކޮށްފައިވަނީ އެ ރިސޯޓްގައި ޗުއްޓީ ހޭދަކޮށް ގައުމަށް ދިޔަ އިޓަލީ މީހަކު ކޮރޯނާ ވައިރަހަށް ޕޮޒިޓިވްވެފައިވާތީ އެވެ. އެހެންވެ، މިހާރު ދަނީ އެ ޓޫރިސްޓު ކޮންޓެކްވި މީހުން ހޯދައި ބަލަން ޖެހޭ ކަންކަން ބަލަމުންނެވެ.

ކުރެއްދޫ ލޮކް ޑައުންކޮށްފައިވާއިރު، އެ ރިސޯޓްގެ ޑޮކްޓަރުގެ ފަރާތުން ވެސް ވަނީ ކޮރޯނާ ވައިރަހުގެ އަލާމަތްތައް ފެނިފަ އެވެ. އެހެންވެ އެ މީހާ ކަރަންޓީނު ކުރުމަށް ފަރުކޮޅުފުއްޓަށް ގެންދިޔުމުގެ މަސައްކަތް ދަނީ ކުރަމުންނެވެ.

އަދި ވ. ތިނަދޫއަށް މީހުން އެރުމާއި ފޭބުން މަނާކޮށްފައިވަނީ އެ ރަށުގައި ޗުއްޓީ ހޭދަ ކުރަމުން ދިޔަ އިޓަލީގެ ޓޫރިސްޓަކު ކޮރޯނާ ވައިރަހަށް ޝައްކު ކުރެވިފައިވާތީ އެވެ. އެމީހާ މިހާރު ހުރީ ފަރުކޮޅުފުށީގައި ކަރަންޓީނު ކޮށްފަ އެވެ. ތިނަދޫއަށް އެރުމާއި ފޭބުން މަނާކޮށްފައިވަނީ އެމީހާގެ ޓެސްޓްގެ ނަތީޖާ ލިބެންދެނެވެ.

އިޓަލީއިން ރާއްޖެއަށް މީހުން އައުން މިހާރު ވަނީ މަނާކޮށްފަ އެވެ. އޭޝިއާއިން ބޭރުގައި އެންމެ ބާރަށް ކޮރޯނާ ވައިރަސް ފެތުރެމުންދާ ގައުމަކީ އިޓަލީ އެވެ