ވައިރަހަށް ޝައްކުކުރެވިގެން ފޯކައިދޫގައި ހުރި ކުރެއްދޫގެ މުވައްޒަފުން ކަރަންޓީނުކުރަނީ

ކޮވިޑް 19 އަށް ޝައްކުކުރެވޭ އަލާމާތްތައް ހުރި ދިވެއްސަކު ށ ފޯކައިދޫއިން ފަރުކޮޅުފުއްޓަށް ގެންދިޔުމުގެ މަސައްކަތް ފަށައިފި އެވެ. އެޗްޕީއޭ އިން ދެންމެ ބުނީ އެމީހާއަކީ ކުރެއްދޫ ރިސޯޓްގެ މުވައްޒަފެއް ކަމަށެވެ.

އެރަށުން ވާހަކަ ދެއްކި މީހަކު ކޭއޯއަށް ބުނީ ށ ފުނަދޫން ޓީމެއް މިއަދު ހަވީރު އައިސް އެ މަސައްކަތްކުރަމުންދާ ކަމަށާއި މިހާރު ސީއެމްބިއުލާންސް ވެސް އެރަށަށް ގެންގޮސް ބަނދަރުގައި ތައްޔާރަށް އޮތްކަމަށެވެ.

އެ މީހާއަކީ މިވަގުތު އޮރެންޖް އެލާޓް ނެރެފައިވާ ކުރެއްދޫ ރިސޯޓްގެ މުވައްޒިފެއް ކަމަށް އެޗްޕީއޭ އިން ވަނީ ބުނެފަ އެވެ.

މިރޭ ހެލްތު މިނިސްޓަރު އަބްދުﷲ އަމީން ވިދާޅުވީ ފަރުކޮޅުފުށީގައި މިވަގުތު އަށް މީހުން އެބަތިބިއިރު އޭގެ ތެރެއިން ދެ މީހުން ކަރަންޓީންކޮށްފައިވާ ކަމަށެވެ.

އަދި ވިދާޅުވީ ކުރެއްދޫ ކޮޓަރިތަކުގައި 93 މީހަކު އެކަހެރިކޮށްފައި އެބަތިބި ކަމަށެވެ. މިނިސްޓަރު އަމީން އިތުރަށް ވިދާޅުވީ ބަތަލާ ރިސޯޓުގެ ކޮޓަރިތަކުގައި 11 މީހަކު ކަރަންޓީންކޮށްފައިވާ ކަމަށެވެ.