ރާއްޖެއިން ދިޔަ އިޓަލީގެ ދެ ފަތުރުވެރިއަކު ވައިރަހަށް ޕޮޒިޓިވްވެއްޖެ

ރާއްޖެއިން ފުރައިގެން ދިޔަ އިޓަލީގެ ދެ ފަތުރުވެރިއަކު، ކޮރޯނާވައިރަހަށް ޕޮޒިޓިވްވެފައިވާ ކަމަށް ސަރުކާރުން މިއަދު ހާމަކޮށްފި އެވެ.

ހެލްތް މިނިސްޓަރު އަބްދުﷲ އަމީން ވިދާޅުވީ 14 ދުވަހުގެ ކަރަންޓީނުގެ މުއްދަތު ފުރިހަމަ ކުރުމަށް ފަހު ރާއްޖެއިން ދިޔަ އިޓަލީގެ ދެ ޓޫރިސްޓެއްގެ ސާމްޕަލް ރާއްޖެއިން ޓެސްޓްކުރި އިރު ކޮރޯނާވައިރަހަށް ޕޮޒިޓިވްވެފައިވާ ކަމަށާއި އަދި އެ ނަތީޖާ ލިބުނީ އެ މީހުން ރާއްޖެއިން ފުރިފަހުން ކަމަށެވެ.

އަދި އެ ދެމީހުން މިހާރު އިޓަލީ އަށް ދަތުރު ކުރަމުންދާ ކަމަށްވެސް މިނިސްޓަރު ވިދާޅުވި އެވެ.

ރާއްޖެއިިން އެންމެ ފުރަތަމަ ކޮރޯނާވައިރަހުގެ ކޭސް އެއް ފެނުނީ ކުރެއްދޫ އައިލެންޑް ރިސޯޓުގައި ޗުއްޓީ ހޭދަކުރި އިޓަލީގެ މީހަކު އެނބުރި ގައުމަށް ދިޔަ ފަހުން، އޭނާ ބައްޔަށް ޕޮޒިޓިވްވިކަން ފާހަގަ ވެގެން ޓެސްޓް ކުރުމުންނެވެ.

އޭގެ ފަހުން މިހާތަނަށް ރާއްޖެއިން ކޮރޯނާވައިރަހުގެ 14 ކޭސް ވަނީ ފެނިފަ އެވެ. އޭގެ ތެރެއިން އަށް މީހަކު ބަލިން ރަނގަޅުވެފައިވާއިރު ފުރަތަމަ ފަހަރަށް ރާއްޖެއިން ދިވެއްސަކު ކޮރޯނާވައިރަހަށް އަށް ޕޮޒިޓިވް ވިކަން މިނިސްޓަރު މިއަދު ވަނީ އިއުލާނު ކުރެއްވި އެވެ