އެމްއެންޔޫ ދަނާލުތަކުގެ ފީ މާފުކޮށްދީފި

މޯލްޑިވްސް ނޭޝަނަލް ޔުނިވާސިޓީ (އެމްއެންޔޫ)ގެ ދަނާލުތަކުގައި ތިބި ދަރިވަރުންގެ ފީ މާފުކޮށްދޭން ނިންމައިފި އެވެ.

ޔުނިވާސިޓީގެ ވައިސް ޗާންސެލާ މުހައްމަދު ޝަރީފު މިއަދު ވިދާޅުވީ ހދ. ކުޅުދުއްފުއްޓާއި މާލެ އާއި ގދ. ތިނަދޫ އަދި ސ. ހިތަދޫގައި ހުންނަ ދަނާލުގައި އުޅޭ ދަރިވަރުންގެ މި މަހާއި އަންނަ މަހުގެ ފީ މާފުކޮށްދޭން ނިންމާފައިވާ ކަމަށެވެ. އެ ދަނާލުތަކުގައި މި ވަގުތު 168 ދަރިވަރުން އެބަތިއްބެވެ.

އޭގެ ތެރެއިން ރަށްރަށުގައި ހުންނަ ދަނާލުތަކުން ކުއްޖެއްގެ އަތުން ނަގަނީ މަހަކު 500 ރުފިޔާ އެެވެ. އަދި މާލޭގައި ހުންނަ ދަނާލުގައި ޝެއާޑް ކޮޓަރިތަކުން 900 ރުފިޔާ އަދި ސިންގަލް ކޮޓަރިތަކުން 1200 ރުފިޔާ ދަރިވަރެއްގެ އަތުން ނަގަ އެވެ.

މިހާރު ފެތުރެމުންދާ ކޮވިޑް-19 އާ ގުޅިގެން އެމްއެންޔޫގެ ކިޔެވުން ވެސް ވަނީ މެދުކަނޑައިލައިފަ އެވެ.