އާންމު ފަރުދުންގެ މުސާރައިގެ ގޮތުގައި ލިބޭ އާމްދަނީން އިންކަމް ޓެކްސް ނަގަނީ

އާންމު ފަރުދުންނަށް މުސާރައިގެ ގޮތުގައި ލިބޭ އާމްދަނީން އިންކަމް ޓެކްސް ނަގަން ފަށައިފި އެވެ.

އިންކަމް ޓެކްސްގެ ގާނޫނުގެ މިދިޔަ ޑިސެމްބަރ މަހު ތަސްދީގު ކުރައްވާ ފައިވާއިރު އެ ގާނުނުގެ ދަށުން މިއަހަރުގެ ޖެނުއަރީން ފެށިގެން ފަރުދުންގެ އާމްދަނީން (މުސާރަ/އުޖޫރަ ނޫން ގޮތްގޮތަށް ލިބޭ އާމްދަނީން) ޓެކްސް ނަގަން ވަނީ ފަށާފަ އެވެ.

އަދި ފަރުދުންނަށް ލިބޭ މުސާރަ/އުޖޫރައިގެ އާމްދަނީން ޓެކްސް ނަގަން ފެށީ މިއަދު އެވެ. ފަރުދުންނަށް ލިބޭ އާމްދަނީ ޓެކްސް ނަގަން ފެށުމާއެކު މިއަދު މީރާއިން ވަނީ ޓެކްސް ފައިސާ ދައްކަން ޖެހޭ ސުންގަޑިތައްވެސް ހިއްސާކޮށްފައެވެ.

ފަރުދުންގެ އާމްދަނީ ޓެކްސް ނަގަން ނިންމާފައިވަނީ ފަސް ބްރެކެޓެއްގެ ދަށުންނެވެ. އެއީ؛
- 60،000 ރުފިޔާ އިން ދަށުގެ އާމްދަނީ - 0 ޕަސެންޓު
- 60،000 އާއި 100،000 ރުފިޔާއާ ދެމެދުގެ އާމްދަނީ: 5.5 ޕަސެންޓު
- 100،00 އާއި 150،000 ރުފިޔާއާ ދެމެދުގެ އާމްދަނީ: 8 ޕަސެންޓު.
- 150،000 އާއި 200،000 ރުފިޔާއާ ދެމެދު އާމްދަނީ އިން 12 ޕަސެންޓު
- 200،000 ރުފިޔާ އިން މަތީގެ އާމްދަނީ އިން 15 ޕަސެންޓު

މަހަކު އެއްފަހަރު ދައްކަން ޖެހޭ އެމްޕްލޯއީ ވިތުހޯލްޑިން ޓެކްސް ރިޓާން އަދި ޕޭމަންޓުގެ ސުންގަޑިއަކީ ކޮންމެ މަހެއްގެ ވެސް 15ވަނަ ދުވަހެވެ.

އިންޓެރިމް ރިޓާން އަދި އިންކަމް ޓެކްސް ރިޓާން ދައްކަން ޖެހެނީ ތިން ފަހަރެއްގެ މަތިންނެވެ. އެ ފައިސާ ދައްކަން ޖެހޭ ސުންގަޑިތަކަކީ؛
- ފުރަތަމަ އިންޓެރިމް ރިޓާން އަދި ޕޭމަންޓް: 31 ޖުލައި 2020
- ދެވަނަ އިންޓެރިމް ރިޓާން އަދި ޕޭމަންޓް: 31 ޖެނުއަރީ 2021
- އިންކަމް ޓެކްސް ރިޓާން އަދި ފަހު ޕޭމަންޓް: 30 ޖޫން 2021

ނޮން ރެސިޑެންޓް ވިތުހޯލްޑިން ޓެކްސް ރިޓާން އަދި ޕޭމަންޓްގެ ސުންގަޑިއަކީ އެމީހަކަށް މުސާރަ ދޭ މަހާ ޖެހިގެން އަންނަ މަހުގެ 15 ވަނަ ދުވަހެވެ.

އާމްދަނީއިން ޓެކްސް ނެގުމަކީ މި މިއަހަރުގެ ބަޖެޓުގައި ދައުލަތަށް އާމްދަނީ ލިބޭނެ ވަސީލަތެއްގެ ގޮތުގައިވެސް ކަނޑައަޅާފައިވާ ކަމެކެވެ.