އާންމުކޮށް ހޯދަން ދަތި ދެ ގުރޫޕެއްގެ ލޭ ހަދިޔާކޮށްދިނުމަށް އެދިއްޖެ

އާންމުކޮށް ހޯދަން ވަރަށް ދަތި ދެ ގުރޫޕެއް ކަމަށްވާ "އޯ" އަދި "ބީ" ނެގެޓިވް ލޭ ހަދިޔާ ކޮށްދިނުމަށް މޯލްޑިވިއަން ބްލަޑް ސަރވިސް އިން އެދިއްޖެ އެވެ.

މޯލްޑިވިއަން ބްލަޑް ސާވިސްއިން ވަނީ ކޯވިޑް-19 އާ ގުޅިގެން ލޭ ލިބުން ދަތިވެފައިވާތީ ލޭ ހަދިޔާކުރުމަށް އެދިފަ އެވެ. ހާއްސަކޮށް "އޯ ނެގެޓިވް" ލެ އާއި "ބީ ނެގެޓިވް" ލޭ ހަދިޔާކުރުމަށްވަނީ އެދިފައެވެ. އެގޮތުން ލޭ ލިބުމުގެ ދަތިކަމަށް ހައްލެއް ހޯދާދިނުމުގެ ގޮތުން މިއަދު ހެނދުނު 10:00 އިން ހަވީރު 16:00 އަށް ލޭ ހަދިޔާ ކުރުމުގެ ފުރުސަތު ހުޅުވާލާފައިވާ ކަމަށް މޯލްޑިވިއަން ބްލަޑް ސާވިސްއިން ބުނެއެވެ.

އުމުރުން 18 އަހަރުވެފައިވާ، ބަރުދަނުގައި 45 ކިލޯ ހުންނަ ކޮންމެ މީހަކަށްވެސް ލޭ ހަދިޔާކުރެވޭނެއެވެ. ލޭ ހަދިޔާކުރެވޭނީ އެ މީހެއްގެ ހިމޮގްލޮބިން ކައުންޓް 12.5 އަށް ވުރެ މަތީ މީހުންނަށެވެ.

މުޅި ރާއްޖޭގައި ތެލަސީމިއާ ކުދިންގެ ނިސްބަތަށް ބަލާއިރު މިހާރުވެސް ގަވާއިދުން ލޭ އަޅަންޖެހޭ 635 ކުދިން ރާއްޖޭގައި ތިބޭއިރު މީގެތެރެއިން ދެބައިކޮށްފަ އެއްބައިހާ ކުދިން ހިދުމަތް ހޯދަނީ މާލޭގައި ހުންނަ ނޭޝަނަލް ތެލަސީމިއާ ސެންޓަރުންނެވެ.