ބިސް، ފިޔާ އަދި އަލުވީގެ އަގު ކޮންޓްރޯލްކޮށްފި

ބިސް، ފިޔާ އަދި އަލުވީގެ އަގު ކޮންޓްރޯލްކޮށް އެތަކެތި ބޮޑުއަގުގައި ވިއްކާ ފަރަތްތައް ޖޫރިމަނާކުރުމަށް ސަރުކާރުން ނިންމައިފި އެވެ.

ބާޒާރުގައި ވިއްކާ ފިޔާ، އަލުވި އަދި ބިހުގެ އަގު އިކޮނޮމިކް މިނިސްޓްރީން ކޮންޓްރޯލް ކުރުމަށް ނިންމާފައިވަނީ މިވަގުތު އިގްތިސޯދީ ހާލަތު ހުރި ގޮތަށް ރިއާޔަތްކޮށެވެ.

އިކޮނޮމިކް މިނިސްޓްރީ އިން މިއަދު ބުނީ، މީގެ ފަހުން މީހުން ދިރިއުޅޭ ރަށެއްގައި ފިޔާ އަދި އަލުވި ކިލޯއެއް ވިއްކޭނެ އެންމެ ބޮޑު އަގަކީ 20 ރުފިޔާ ކަމަށެވެ. އަދި ބިހެއް ވިއްކޭނެ އެންމެ ބޮޑު އަގަކީ 1.80 ކަމަށެވެ.

އެ އަގަށް ވުރެ ބޮޑުކޮށް އަގު ކޮންޓްރޯލުކޮށްފައިވާ މުދަލެއް ވިއްކައިފި ނަމަ ހިލާފުވާ ފުރަތަމަ ފަހަރު އެ ފަރާތެއް ގިނަވެގެން 100,000 ރުފިޔާ އިން ޖޫރިމަނާ ކުރާނެއެވެ. އަދި، ކުށް ތަކުރާރުކުރާ ކޮންމެ ފަހަރަކު އެ ފަރާތް އެންމެ ގިނަވެގެން 100,000 ރުފިޔާއިން ޖޫރިމަނާކޮށް އަދި ހަ މަސް ދުވަހަށްވުރެ ދިގުނޫން މުއްދަތަކަށް ވިޔަފާރިކުރާ ތަން ބަންދުކުރުމަށް އަންގާނެއެވެ.