ކުލި ނުދެއްކޭ މީހުންނަށް ލުއި ދިނުމުގެ ބިލް އެޖެންޑާއެއް ނުކުރި

މި ދުވަސްވަރު މާލެ ސަރަހައްދުގައި ކުއްޔަށް ދިރިއުޅޭ މީހުންނަށް ކުލި ނުދެއްކުނަސް ގެއިން ނެރުން ހުއްޓުވުމަށް މާވަށު ދާއިރާގެ މެމްބަރު އަދި އިދިކޮޅު ޕީއެންސީގެ ނައިބު ރައީސް މުހައްމަދު ސައީދު ރައްޔިތުންގެ މަޖިލީހަށް ހުށަހެޅުއްވި ބިލް އެޖެންޑާ ނުކޮށް އެ ބިލް އަލުން ރަނގަޅު ކުރުމަށް ވިދާޅުވެ މަޖިލީހުގެ ރިޔާސަތުން ބިލް އަނބުރާ ފޮނުވާލައިފި އެވެ.

"ކޮވިޑް-19 ގެ އެހީތެރިކަމުގެ ބިލް" އެޖެންޑާ ނުކޮށް އަނބުރާ ފޮނުވާލާފައިވަނީ މަޖިލީހުގެ މިއަދުގެ ޖަލްސާގައި މަޖިލީހުގެ ރައީސް މުހައްމަދު ނަޝީދު ވިދާޅުވި ގޮތުގައި މަޖިލީހުގެ ގަވައިދަށް ނުފެތޭތީ އެވެ. އަދި ބިލް އިސްލާހު ކުރެއްވުމަށް ވަނީ އެދިވަޑައިގެންފަ އެވެ. މެންބަރު ސައީދުގެ ބިލް މަޖިލީހުގެ މިއަދުގެ ޖަލްސާ އަށް ހުށަހެޅުއްވުުމުގެ ފުރުސަތު އޭނާ އަށް ލިބިވަޑައިނުގަތީ، ދައުލަދުގެ ހަރަދާއި އާމްދަނީއާ ގުޅޭ ކަންތައްތައް އެ ބިލްގައި ހިމެނޭތީ އެވެ.

ނަޝީދު ވިދާޅުވީ ސައީދުގެ ބިލު މަޖިލީހަށް ގެނެސް އެ ބިލަށް ބަހުސް ކުރުމަކީ އެ މަނިކުފާނު ވަރަށް އެދިވަޑައިގަންނަވާ ކަމެއް ކަމަށާއި ބިލް އަލުން ބަދަލުކޮށްގެން ގެންނަން އެދިވަޑައިގަތީ އެހެންވެ ކަމަށެވެ.

ރައްޔިތުންގެ މަޖިލީހުގެ ގަވައިދު ބުނާ ގޮތުން ދައުލަދުގެ ހަރަދާއި އާމްދަނީއާ ގުޅޭ ކަންތައްތައް ބަޔާންކުރާ ބިލްތައް ހުށަހެޅޭނީ ސަރުކާރުގެ ފަރާތުންނެވެ. އެ އުސޫލުން އެފަދަ ބިލްތައް ހުށަހެޅުއްވޭނީ ވެރިކަން ކުރާ ޕާޓީގެ މެމްބަރުންނަށެވެ.

ބިލްގައިވާ ބައެއް ކަންތައްތައްތަކުގެ ތެރޭގައި މާލެ ސަރަހައްދުގައި ގެދޮރު ކުއްޔަށް ހިފައިގެން އުޅޭ މީހުންގެ ތެރެއިން މި ހާލަތުގައި ކުލި ނުދެއްކޭ މީހުން ގެއިން ނެރުން، ގާނޫނަކުން މަނާކުރުން ހިމެނެ އެވެ.

އަދި ކޮވިޑް-19 ފެތުރޭތީ އަޅާފައިވާ ފިޔަވަޅުތައް އުވައިލައި، ވެލާނާ އިންޓަނޭޝަނަލް އެއާޕޯޓުން ބޭރުގެ ދަތުރުފަތުރުތައް އަލުން ހުޅުވެންދެން، މާލެ ސަރަހައްދުގައި ދިރިއުޅެން ކުއްޔަށް ދޫކޮށްފައިވާ ތަންތަނުގެ ކުލީގެ 50 ޕަސެންޓަށް ވުރެ ބޮޑު ނޫން އަދަދެއް ނުދައްކައިގެން އެ ތަނަކުން ބޭރުކޮށްގެން ނުވާނެ ކަމަށް އެ ބިލްގައި ބުނެފައި ވެ އެވެ.