ހެޕީ މާކެޓުން ކުޅުދުއްފުށީ ޓާސްކް ފޯސްއަށް ފެނާއި ސެނިޓައިޒާ ހަދިޔާކޮށްފި

ކޮވިޑް-19 އާ ގުޅިގެން ކުޅުދުއްފުށީގައި އުފައްދާފައިވާ ޓާސްކް ފޯސްއަށް ހެޕީ މާކެޓުން ގިނަ އަދަދެއްގެ ފެނާއި ސެނިޓައިޒާ ހަދިޔާކޮށްފި އެވެ.

ކުޅުދުއްފުށީ ޓާސްކް ފޯސްގެ ޗެއާމަން އަދި ރީޖަނަލް ހޮސްޕިޓަލްގެ މެނޭޖަރު އަހުމަދު ދާއޫދު ވިދާޅުވީ، ސޯޝަލް ސަޕޯޓް ޑެސްކުގައި ބޭނުންކުރުމަށް ހޭންޑް ސެނިޓައިޒާ އާއި ބޯފެން ހެޕީ މާކެޓުން ހަދިޔާކުރިކަމީ ލިބުނު ވަރަށް ބޮޑު ހިތްވަރެއް ކަމަށެވެ. އަދި އެކަން ޝުކުރުވެރިކަމާއެކު ބަލައިގަންނަ ކަމަށް އަހުމަދު ވިދާޅުވި އެވެ.

ހެޕީ މާކެޓުން ކުޅުދުއްފުށީ ޓާސްކް ފޯސްއަށް 500މލ ގެ 100 ފެން ކޭސް އާއި 15 ލީޓަރުގެ ސެނިޓައިޒާ ހަދިޔާކޮށްފައިވެ އެވެ.

ކުޅުދުއްފުށީ ސޯޝަލް ސަޕޯޓް ޑެސްކް އަދި ބަނދަރުގައި ގާއިމުކޮށްފައިވާ ސެކިއުރިޓީ ޑެސްކްގައި 24 ގަޑިއިރު މުވައްޒަފުން އަންނަނީ މަސައްކަތްކުރަމުންނެވެ. އެތަނުގައި ފުލުހުންނާއި ސިފައިންގެ އިތުރުން ކައުންސިލް މުވައްޒަފުންނާއި ހޮސްޕިޓަލް އަދި ރެޑްކުރެސެންޓްގެ ދަރުމަވެރިންގެ އިތުރުން ބައެއް މުވައްސަސާތަކުގެ ވެރިން އަންނަނީ އަމަލީ ގޮތުން މަސައްކަތް ކުރަމުންނެވެ.