ސަރުކާރު އޮފީސްތަކާއި ސްކޫލްތައް ބަންދު ވާނެ

ލޮކްޑައުންއަށް ލުއިތަކެއް ދިން ނަމަވެސް ސަރުކާރުގެ އޮފީސްތަކާއި ސުކޫލްތައް ހުޅުވުމަށް ނިންމާފައި ނުވާ ކަމަށް ހެލްތް މިނިސްޓަރު އަބްދުﷲ އަމީން ވިދާޅު ވެއްޖެ އެވެ.

މިނިސްޓަރު އަމީން ވިދާޅުވީ ލޮކްޑައުން އުވާލާނީ ފިޔަވަހިތަކަކަކަށް ބަހާލައިގެން ކަމަށެވެ. އެގޮތުން ކުރިއަށް އޮތް ދެ ހަފުތާގައި ލުއި ދިނުމަށް ނިންމި ނަމަވެސް ސަރުކާރުގެ އޮފީސްތަކާއި، ސުކޫލަތައް ހުޅުވުމަށް ހަމަޖެހިފައި ނުވާ ކަމަށެވެ.

ނަމަވެސް ޔުނިވާސިޓީތަކާއި ކޮލެޖްތަކަށް އޮންލައިންކޮށް ކިޔަވައިދިނުމުގެ ފުރުސަތު ހުޅުވާލާފައިވާނެ ކަމަށެވެ.

މީގެ އިތުރުން ޕާކްތަކާއި އެއްވެ އުޅޭ ތަންތަނުގެ އިތުރުން ކުރިއަށް އޮތް ދެ ހަފުތާގައި މިސްކިތްތައް ވެސް ހުޅުވަން ހަމަޖެހިފައެއް ނުވެއެވެ.

މިދިޔަ މަހުގެ 14 ވަނަ ދުވަހުން ފެށިގެން މާލެ ސިޓީ ވަނީ ލޮކްޑައުން ކޮށްފަ އެވެ. ލޮކްޑައުންގެ ހާލަތުގައި ގިނަ ކަންތައްތަކެއް ހިފަހައްޓާފައިވީ ނަމަވެސް މާދަމާއިން ފެށިގެން ލުއިތަކެއް ދިނުމަށް ވަނީ ނިންމާފަ އެވެ.

އެގޮތުން މާދަމާއިން ފެށިގެން ގޭބީސީތަކުން ނިކުމެވޭ މީހުންގެ އަދަދު އިތުރުކޮށް، ބޭރުގައި އުޅެވޭ ވަގުތަކުތައް އިތުރު ކުރުމުގެ ފުރުސަތު ވެސް ދިނުމަށް ވަނީ ނިންމާފަ އެވެ. އަދި ބައެއް ކަހަލަ ވިޔަފާރިތަކަށް ފުރުސަތު ދިނުމަށް ވަނީ ނިންމާފަ އެވެ.