ސްކޫލްތަކަށް 12،500 އަތްދޮންނަ ފުޅި ހޯދަނީ

ސްކޫލްތަކުގެ ކުލާސްރޫމްތަކަށް ބޭނުންވާ 12500 ސައިބޯނި ފުޅި ހޯދުމަށް އެޑިއުކޭޝަން މިނިސްޓްރީން އިއުލާނުކޮށްފި އެވެ.

އެޑިއުކޭޝަން މިނިސްޓްރީން ގެޒެޓްކުރި އިއުލާނުގައި ބުނެފައި ވަނީ ޔުނިސެފްގެ "ސްކޫލް ވޮޝް ޕްރޮގުރާމް"ގެ ނަމުގައި ޕްރޮގްރާމެއް ކުރިއަށް ގެންދަން މިނިސްޓްރީން ނިންމާފައިވާ ކަމަށެވެ. އެ ޕްރޮގްރާމުގެ ދަށުން ސްކޫލްތަކުގެ ކުލާސްރޫމްތަކަށް 500 އެމްއެލްގެ 12,500 އަތްދޮންނަ ސައިބޯނި ފުޅި ހޯދަން ބޭނުންވާ ކަމަށެވެ.

އެ އިއުލާންގައިވާ ގޮތުން އަތްދޮންނަ ސައިބޯނިފުޅި ފޯރުކޮށްދޭން ބީލަން ހުށަހެޅޭނީ މިނިސްޓްރީ އޮފް އިކޮނޮމިކް ޑިވެލޮޕްމަންޓްގެ ކުދި އަދި މެދު ފަންތީގެ ވިޔަފާރީގެ ގިންތިއަކުން ގިންތިއެއްގައި ރަޖިސްޓްރީ ކުރެވިފައިވާ ދިވެހި ވިޔަފާރިތަކަށެވެ.

ޕްރޮޖެކްޓްގައި ބައިވެރިވާން އެދޭ ފަރާތްތަކުން މިއަދުން ފެށިގެން، މި މަހުގެ ހަވަނަ ދުވަހުގެ ނިޔަލަށް އީމެއިލް މެދުވެރިކޮށް ރަޖިސްޓްރީ ކުރުމުގެ ފުރުސަތު މިހާރު ވަނީ ހުޅުވާލައިފަ އެވެ. އަދި ބީލަން ހުށަހެޅޭނީ މި މުއްދަތުގައި ރަޖިސްޓްރީ ކުރާ ފަރާތްތަކަށް ކަމަށްވެސް އެ އިއުލާންގައިވެއެވެ.

ކޮވިޑް-19 ގެ ސަބަބުން މާޗުމަހުގެ ތެރޭގައި ސްކޫލުތަކުގެ ކިޔެވުން މެދުކަނޑާލާފައި އޮތް ނަމަވެސް އޮންލައިންކޮށް ނޫނީ ޓެލެކުލާސް މެދުވެރިކޮށް އަަންނަނީ ކިޔަވާދެމުންނެވެ. ނަމަވެސް ރައްކާތެރިކަމުގެ ހުރިހާ ފިޔަވަޅެއް އަޅައިގެން ވީ އެންމެ އަވަހަކަށް ސްކޫލުތައް ހުޅުވަން ތައްޔާރުވަމުން އަންނަ ކަމަށް އެޑިއުކޭޝަން މިނިސްޓަރު ވަނީ ދާދި ފަހުން ވިދާޅުވެފަ އެވެ.