ރިސާޗް ކުރާ ފަރާތްތަކަށް ހާއްސަ ކޮށްގެން އެވިޑް ކޮލެޖުން ވެބިނާ ސީރީޒެއް ބާއްވަނީ

އެވިޑް ކޮލެޖުގެ ފެކަލްޓީ އޮފް ރިސާޗް އެންޑް އިނޮވޭޝަންގެ ފަރާތުން އިންތިޒާމްކޮށްގެން އޮންލައިން ވެބިނާ ސީރީސްއެއް ބާއްވަން ހަމަޖައްސައިފިއެވެ.

އެ ކޮލެޖުގެ ފެކަލްޓީ އޮފް ރިސާޗް އެންޑް އިނޮވޭޝަންގެ ޑީން ނާހީދު ރަޝާދު ވިދާޅުވީ މި ސެމިނާ ސީރީޒްގެ މައިގަނޑު މަގުސަދަކީ މަތީ ތައުލީމު ހާސިލު ކުރަމުންދާ ދަރިވަރުންނާއި އަދި ކިޔަވައިދެއްވާ މުދައްރިސުންގެ ކިބައިގައި އިލްމީ ދިރާސާ ކުރުމުގެ ގާބިލުކަން އިތުރުކުރުމާއި އިލްމީ ދިރާސާ ކުރުމުގައި މަޝްއޫލުވެ އުޅުމަށް ލޯބިޖެއްސުމާއި އަދި މުޖުތަމައުގައި އިލްމީ ދިރާސާ ކުރުމުގެ ވައްޓަފާޅި އަށަގެނުވުން ކަމަށެވެ.

ޒޫމް މެދުވެރިކޮށް ކުރިއަށް ގެންދަން ނިންމާފައިވާ ވެބިނާ ސީރީޒްގެ ފުރަތަމަ ތިން ސެޝަން ބާއްވާނީ މި މަހުގެ 22، 23، އަދި 24 ގައެވެ. އެ ކޮލެޖުން ބުނީ މި ތިން ސެޝަނަކީ ވެސް އެވިޑް ކޮލެޖްގެ ސީއެސްއާރުގެ ދަށުން، ރާއްޖެއާއި ބައިނަލްއަގުވާމީ އެކި ގައުމުތަކަށް ހުޅުވާލެވިގެން، ބާއްވާ ސީރީޒެއް ކަމަށާއި، ބައިވެރިންގެ ފަރާތުން އެއްވެސް ފީއެއް ނުނަގާނެ ކަމަށެވެ.

ސެޝަންތަކުގައި ބައިވެރިވުމަށްޓަކައި ރެޖިސްޓްރީވާނީ ލިންކެއް ބޭނުންކޮށްގެންނެވެ.

https://forms.gle/3TzHEKrY4foeQwhY6

ޑިގްރީ، މާސްޓަރސް އަދި ޕީއެޗްޑީ އަށް ކިޔަވާ ދަރިވަރުންގެ އިތުރުން މުދައްރިސުންނާއި، ޢިލްމީ ދިރާސާކޮށް ޝާއިއު ކުރުމަށް ލޯބިކުރާ ފަރާތްތަކަށް އަމާޒުކޮށްގެން މިބާއްވާ ވެބިނާރގައި ތަގުރީރު ކުރައްވާނީ މެލޭޝިޔާގެ މަޝްހޫރު ޔުނިވަރސިޓީ އެއް ކަމުގައިވާ "ޔުނިވަރސިޓީ ސައިންސް މެލޭޝީއާ" ގެ ޕްރޮފެސަރ ޑޮކްޓަރ މުހައްމަދު ކަމަރުލް ކަބިލާން އެވެ.

އިލްމީ ދިރާސާކުރުމާއި ޕަބްލިޝްކުރުމުގައި ވަރަށް ފުންނާބު އުސް، ޕްރޮފެސަރ ޑޮކްޓަރ ކަބިލާންގެ ލިޔުންތައް ގޫގުލް ސްކޮލާގައި ނަކަލުކޮށްފައިވާ އަދަދު 1900 އާއި ގާތް ކުރެއެވެ. މީގެ އިތުރުން އެބޭފުޅާއަކީ މަޝްހޫރު ޖާރނަލްއެއް ކަމުގައިވާ "ބްރިޓިޝް ޖަރނަލް އޮފް އެޑިޔުކޭޝަނަލް ޓޭކްނޮލޮޖީ" ގެ އެޑިޓޯރިއަލްބޯޑުގެ މެމްބަރެއްވެސް މެއެވެ.

އެ ކޮލެޖުން ބުނީ ތިން ދުވަހަށް ދެމިގެންދާ މި ވެބިނަރ އަމާޒު ކުރެވިފައިވަނީ ހެދިފައިވާ ޕީ.އެޗް.ޑީ ތީސިސް، މާސްޓަރސް ޑިޒަރޓޭޝަން އަދި އެހެނިހެން ދިރާސާ ޕްރޮޖެކްޓްތައް ބައިނަލް އަގުވާމީ ގޮތުން ފުންނާބު އުސް ޕިއަރ ރިވިއުޑް ޖާނަލް ތަކުގައި ޝާއިއު ކުރުމުގައި ލިޔަންޖެހޭ އުސޫލުތަކާއި އުކުޅުތައް އުނގަންނައި ދިނުމަށެވެ. ޒޫމް ބޭނުންކޮށްގެން އޮންލައިންކޮށް މިބޭއްވޭ ވެބިނަރ ސީރީސް އަކީ، އިލްމީ ދިރާސާ ކުރުމާއި އަދި މަޝްހޫރު ޖާރނަލްތަކުގައި ޝާއިއު ކުރުމާއި ބެހޭ އަގުހުރި މައުލޫމާތު، ގިނަ އަދައެއްގެ ބަޔަކަށް ފޯރުކޮށްދިނުމަށްޓަކައި އެވިޑް ކޮލެޖުން ހުޅުވައި ލެވިފައިވާ ތަނަވަސް ފަހި ފުރުސަތެއް ކަމަށެވެ.

އެވިޑް ކޮލެޖަކީ ދިވެހިރާއްޖޭގައި ހިންގާ އަމިއްލަ އެންމެބޮޑު އެއްކޮލެޖެވެ. މިހާރުވެސް އެކި ދާއިރާތަކުން ތަފާތު ކޯސްތަކުގައި ދެހާހަށްވުރެ ގިނަކުދިން އެވިޑް ކޮލެޖްގައި މަތީ ތައުލީމު ހާސިލްކުރަމުން ގެންދެއެވެ.