އެމްބީއެސްއިން އަނެއްކާވެސް ލޭ ހަދިޔާ ކުރަން އެދެފި

ސްޓޮކްގައި ހުރި ލޭ ހުސްވާތީ އަނެއްކާވެސް ލޭ ހަދިޔާ ކުރަން މޯލްޑިވްސް ބްލަޑް ސާވިސަސް އިން އެދެފި އެވެ.

އެމްބީއެސްގެ ސްޓޮކްގައި ހުރި ލޭ މަދުވެގެން އެތަނުން ވަނީ ލޭ ހަދިޔާކުރުމަށް މިދިޔަ މާޗު މަހުން ފެށިގެން އެކި ފަހަރު މަތިން އެދިފަ އެވެ.

"މީހާރު" ނޫހަށް މައުލޫމާތު ދެމުން އެމްބީއެސްގެ ކްލިނިކަލް ނާސް ގުލިސްތާން އީސާ ވިދާޅުވީ މިހާރު އެއްވެސް ވަރަކަށް ލޭ ނެތޭ ބުނާ ވަރަށް ސްޓޮކް މަދުވެފައިވާ ކަމަށާއި އަދި ވީހާ ވެސް ގިނަ ބަޔަކު އަވަށް ލޭ ހަދިޔާކުރުމަށް އެދޭ ކަމަށެވެ.

ގުލިސްތާން ވިދާޅުވީ ހުރިހާ ގްރޫޕެއް ވެސް ލޭ ވެސް ސްޓޮކްގައި މިހާރު ހުރީ ވަރަށް މަދުން ކަމަށެވެ. ތެލަސީމިއާ ޕޭޝަންޓުންނަށް ހަފުތާ އަކު 160 ޔުނިޓްގެ ލޭ ބޭނުންވާ ކަމަށާއި އެ މިންވަރު އެތަނުގައި ނުހުންނަތާ ދެ ހަފުތާއެއްހާ ދުވަސް ވެދާނެ ކަމަށް އޭނާ ވިދާޅުވި އެވެ.

ކޮވިޑް-19 އިން ރައްކާތެރިވުމަށްޓަކައި މީހުން އެއްވެ އުޅުން މަނާކޮށް އަދި ލޮކްޑައުން ކުރުމުން އެމްބީއެސް އަށް އާންމުކޮށް ލޭ ލިބޭ ބްލަޑް ޑޮނޭޝަން ކޭމްޕުތައް ކުރިއަށް ގެންދިއުން ހުއްޓި ލޭ ލިބުން ވަރަށް ބޮޑަށް މަދުވި އެވެ.

އުމުރުން 18 އަހަރުވެފައިވާ ސިއްހަތު ރަނގަޅު ކޮންމެ މީހަކަށް އަހަރަކު ހަތަރު ފަހަރު ލޭ ހަދިޔާކުރެވޭނެ އެވެ. އެއީ އެ މީހެއްގެ ބަރުދަނުގައި 45 ކިލޯ ހުންނަ ނަމަ އާއި ހިމޮގްލޮބިން ކައުންޓްގައި 12.5 ޕޮއިންޓު ހުންނަ ނަމަ އެވެ. ލޭ ހަދިޔާކުރަން ބޭނުން މީހުން، އެޕޮއިންޓްމަންޓް ހަދަން އޭނާ އިލްތިމާސްކުރެއްވި އެވެ.

އެގޮތުން އެޕޮއިންޓްމެންޓް ހަދަން ގުޅާނީ 3306089 އަށެވެ. އަދި އެމްބީއެސް އިން ދޭ ވަގުތަށް އެތަނަށް ދާން އޭނާ އެދިވަޑައިގަތެވެ.