ހައި ރިސްކް ދަރިވަރުންނާއި މުވައްޒަފުންނަށް ލުއިތަކެއް ދެނީ

އަންނަ މަހު ސްކޫލްތައް ހުޅުވާއިރު ހައި ރިސްކުގައި ތިބި ދަރިވަރުންނާއި މުވައްޒަފުންނަށް ލުއިތަކެއް ދޭން ނިންމާފައިވާ ކަމަށް އެޑިއުކޭޝަން މިނިސްޓްރީ އިން ބުނެފިއެވެ.

މިކަން ހާމަކުރައްވާ އެޑިއުކޭޝަން މިނިސްޓްރީން ކުރި ޓުވިޓްގައި ބުނެފައިވަނީ އަންނަ މަހު ސްކޫލުތައް ހުޅުވުމުގެ ކުރިން ކޮވިޑް ބަލި ތަހައްމަލް ކުރަމުންދާ ފަރާތްތަކަށާއި ހައި ރިސްކުގައި ތިބި ދަރިވަރުންނާއި މުވައްޒަފުންނަށް ލުއިތަކެއް ދޭން ނިންމާފައިވާ ކަަމަށެވެ.

ޖުލައި މަހުގެ 1 ގައި ސްކޫލްތައް ހުޅުވުމަށް ނިންމާފައިވާއިރު @MoEdumvއާއި ސްކޫލުތަކުން މިހާރު ދަނީ ނިއު ނޯމަލްއަށް ސްކޫލްތައް ހުޅުވުމުގެ ކުރިން ކުރަންޖެހޭ ކަންތައްތަކާއި، ސްކޫލްތައް ހުޅުވުމުން ކުރަންޖެހޭ ކަންތައްތައް ކުރުމަށް ތައްޔާރުވަމުން. pic.twitter.com/AVVOrUXf9X

— Ministry of Education (@MoEdumv) June 17, 2020

އަދި މި ބަލި ތަހައްމަލް ކުރަމުންދާ ދަރިވަރުންގެ މައުލޫމާތު އެއްކޮށް އެ ދަރިވަރުންނަށް ފިލާވަޅު ފޯރުކޮށްދިނުމުގެ އިންތިޒާމްތައް ހަމަޖައްސަމުން ދާކަމުގައިވެސް މިނިސްޓްރީން ބުނެ އެވެ.

ސްކޫލްތައް ހުޅުވުމުގެ ތައްޔާރީތަކުގެ ތެރެއިން ދަރިވަރުންނަށް ބޭނުންވާ މާސްކް ހޯދުމަށް ބެލެނިވެރިންނަށް އިރުޝާދު ދިނުމާއި ސްކޫލް މާހައުލުގައި ގައިދުރުކުރެވޭނެ އިންތިޒާމްތައް ހަމަޖައްސަމުގެ މަސައްކަތް ސްކޫލްތަކުގައި ކުރެވެމުންދާ ކަމަށް މިނިސްޓްރީއިން ހިއްސާކޮށްފައިވެއެވެ. އަދި އަތް ދޮވުމުގެ އިންތިޒާމާއި ޑިސްއިންފެކްޓްކުރުމާއި ސެނެޓައިޒް ކުރުމުގެ އިންތިޒާމްވެސް ހަމަޖައްސަމުން ދާކަމުގަ އެވެ.

އަންނަ މަހު ސްކޫލުތައް ހުޅުވުމުގެ މަސައްކަތް ކުރަމުން އަންނަ އިރު ފުރަތަމަ ކިޔަވައިދިނުމައް ހަމަޖެހިފަ އޮތީ ހަފްތާއަކު 4 ދުވަހު ދުވާލަކު ހަތަރު ގަޑިއިރުކަމައް މިނިސްޓްރީން ވަނީ މީގެ ކުރިން ބުނެފަ އެވެ.