ގުޅުން ނެތް ކޭސްތައް އިތުރުވަނީ

ކޮވިޑް-19 ފެތުރުން ކޮންޓްރޯލްކުރުމަށް އަޅާފައިވާ ލޮކްޑައުންގެ ލުއިތަކަށްފަހު އެއްވެސް ކޭސް އަކާ ގުޅުން ނެތް ކޭސްތައް އިތުރުވަމުން އަންނަ ކަމަށް ޑރ. އިބްރާހިމް އަފްޒަލް ވިދާޅުވެއްޖެ އެވެ.

ރޭ ނޭޝަނަލް އެމަޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ޑރ. އަފްޒަލް ވިދާޅުވީ ޕޮޒިޓިވް ކޭސްތައް އެއް ކޭސް އަނެއް ކޭސްއާ ގުޅުމެއް ނެތި ފެންނަ މިންވަރު އިތުރުވެފައިވާ ކަމަށާއި އެއީ ކޮމިއުނިޓީ ސްޕްރެޑް އިތުރުވާ ކަމުގެ އަލާމާތެއް ކަމަށެވެ. ނަމަވެސް ކޭސްތަކުގެ ޖުމްލަ އަދަދު އެއާ އެކު އިތުރު ނުވާތީ އަދި އެއީ މާބޮޑު ކަންބޮޑުވުމެއް ނޫން ކަމަށެވެ.

ޑރ. އަފްޒަލް ވިދާޅުވީ މިހާރު ދީފައިވާ ލުއިތަކާ މެދު ދެވަނަ ވިސްނުމަކަށް ދާން ޖެހޭނީ މި ޓްރެންޑް މިހެން ހުރުމާ އެކު ޖުމްލަކޮށް ކޭސްތަކުގެ އަދަދު އިތުރުވާ ނަމަ ކަމަށެވެ.

ޑޮކްޓަރު އިތުރަށް ވިދާޅުވީ އިއްޔެގެ ޕޮޒިޓިވް ކޭސްތަކުގައިވެސް ކޮންމެސް ވަރަކަށް ކުދި ކްލަސްޓާތަކާއި އެހެން ކްލަސްޓާތަކާ ގުޅުންހުރި މީހުން ތިބި ނަމަވެސް، ގިނައީ އިންޑެޕެންޑެންޓް ކޭސްތައް ކަމަށެވެ.

ޑރ. އަފްޒަލް ވިދާޅުވީ ގުޅުން ނެތް ކޭސްތައް އިތުރުވުމާއެކު، ޕޮޒިޓިވްވާ މީހުންގެ ޖުމްލަވެސް އިތުރުވަމުން އަންނަ ނަމަ، އެއީ ފުރަބަންދަށް ދިން ލުއިތަކުގެ ސަބަބުން، މީހުން މާބޮޑަށް ހަރަކާތްތެރިވެ އުޅުމުގެ ސަބަބުން ކޮމިއުނިޓީ ސްޕްރެޑް އިތުރުވަނީ ކަމަށް ބެލެވިދާނެ ކަމަށެވެ.

ރާއްޖެއިން މިހާތަނަށް 2120 މީހަކު މި ބައްޔަށް ޕޮޒިޓިވްވެފައިވާއިރު އޭގެ ތެރެއިން ފަރުވާހޯދަމުން ދަނީ 433 މީހެކެވެ. 1677 މީހަކު މިހާރު ވަނީ މި ބަލިން މުޅިން ރަނގަޅުވެފަ އެވެ. ބަލި ޖެހުނު މީހުންގެ ތެރެއިން 8 މީހަކު ވަނީ މަރުވެފަ އެވެ.