ގެވެށި އަނިޔާ ރިޕޯޓްކުރާ މިންވަރު އިތުރު ވެއްޖެ

މިދިޔަ މަހު ފަހުކޮޅުން ފެށިގެން ގެވެށި އަނިޔާ ރިޕޯޓްކުރާ މިންވަރު އިތުރުވެފައިވާ ކަމަށް ޖެންޑާ މިނިސްޓަރ އާއިޝަތު މުހައްމަދު ދީދީ ވިދާޅުވެއްޖެ އެވެ.

ރޭ ނެޝަނަލް އިމަޖެންސީ އޮޕަރޭޝަން ސެންޓަރު (އެންއީއޯސީ) ގައި ބޭއްވި ނޫސްވެރިންގެ ބައްދަލަވުމުގައި ނޫސްވެރިއަކު ކުރި ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އެޕްރީލް އަނިޔާގެ ރިޕޯޓްކުރާ މިންވަރު މަދުވިކަން ފާހަގަވި ފާހަގަ ކުރެވުނު ކަމަށާއި މިދިޔަ މަހުފަހުކޮޅާ ޖެހެންދެންވެސް އެކަން އެގޮތަށް އޮތް ކަމަށެވެ. ނަމަވެސް މިދިޔަ މަހުގެ ފަހުކޮޅުން ފެށިގެން އަނެއްކާވެސް އަނިޔާގެ ރިޕޯޓް ކުރާ ވަރު އިތުރުވެފައިވާ ކަމަށެވެ.

މިނިސްޓަރު ވިދާޅުވީ ގިނައިން ރިޕޯޓްކޮށްފައިވާކަން ފާހަގަ ކުރެވިފައިވަނީ ބޮޑަށް ޑޮމެސްޓިކް ވަޔަލެންސް ކަމަށާއި އަދި ޑޮމެސްޓިކް ވަޔަލެންސްގައި ވެސް ފިޒިކަލް ވަޔަލެންސް ބޮޑަށް ފާހަގަކުރެވިފައިވާ ކަމަށެވެ. އަދި މި މުއްދަތުގެ ތެރޭގައި ކުޑަކުދިންނަށް ޖިންސީ ގޯނާ ކުރުމުގެ މައްސަލަތައް ވެސް މި މުއްދަތުގައި އިތުރުވެފައިވާކަން ފާހަގަ ކުރެވޭ ކަމަށް މިނިސްޓަރު ވިދާޅުވި އެވެ.

ނަމަވެސް މިދިޔަ އަހަރުގެ ތަފާސްހިސާބުތަކާ އަޅާ ބަލާއިރު އިރު މިއަހަރު މައްސަލަތައް ވަކި އިތުރުވެފައި ނުވާ ކަމަށް ވެސް މިނިސްޓަރު ވިދާޅުވި އެވެ.

މި އަހަރުން ފެށިގެން މިހާތަނަށް ހުށަހެޅި ކުޑަކުދިންނާ ގުޅުން ހުރި މައްސަލަތަކުގެ އަދަދަކީ 387 އެވެ އޭގެ ތެރެއިން 221 މައްސަލައަކީ އަންހެންކުދިންނާއި ގުޅޭ މައްސަލަ އެވެ. އަދި 166 މައްސަލަ އަކީ ފިރިހެން ކުދިންނާއި ގުޅުންހުރިމައްސަލަ ތަކެވެ. 112 މައްސަލައެއް ވަނީ ބޮޑެތިމީހުންނަށް ގެވެށި އަނިޔާ ދިން ކަމަށް ރިޕޯޓް ކޮށްފަ އެވެ.

މިމުއްދަތުގެ ތެރޭގައި ނަފްސާނީ މައްސަލަ ތަކުގައި ޖެންޑާ މިނިސްޓްރީގެ އެހީތެރިކަން ހޯދުމަށް އެދުނު މީހުންގެ އަދަދުވެސް މީގެކުރިއާ އަޅާބަލާއިރު ވަނީ އިތުރުވެފަ އެވެ.