މާދަމާއިން ފެށިގެން މާލޭގެ މިސްކިތްތަކުގައި ޖަމާއަތުގައި ނަމާދުކުރަން ފަށަނީ

މާދަމާއިން ފެށިގެން މާލޭ ސަރަހައްދުގެ މިސްކިތްތަކުގައި ޖަމާއަތުގައި ނަމާދު ކުރުމުގެ ހުއްދަ ދޭން ނިންމާފައިވާކަން ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހު އިއުލާން ކުރައްވައިފި އެވެ.

ކޮވިޑް-19 އިން ރައްކާތެރިވުމުގެ ގޮތުން އަޅާ ރައްކާތެރި ކަމުގެ ފިޔަވަޅެއްގެ ގޮތުން އާންމު ތަންތަނަށް އެެއްވުމާއި މިސްކިތް ތަކުގައި ޖަމާއަތުގައި ނަމާދުކުރުން ވަނީ މެދުކަނޑާލާފަ އެވެ. ނަމަވެސް ކޮވިޑް ބަލިމަޑުކަމުގެ އަސަރު ނެތް ރަށްތަކުގައި ޖަމާއަތުގައި ނަމާދު ކުރުން މިހާރުވަނީ ހުޅުވާލާފަ އެވެ.

މާލެ ސަރަހައްދުގެ މިސްކިތްތަކުގައި ޖަމާއަތުގައި ނަމާދުކުރުން މެދުކަނޑާލާފައިވަނީ މިދިޔަ މާޗު މަހުގެ 18 ވަނަ ދުވަހު އެވެ.

މާދަމާއިން ފެށިގެން ޖަމާއަތުގައި ނަމާދުކުރަން ހުއްދަ ދޭން ނިންމާފައިވާ ކަމަށް ރައީސް މިއަދު ވިދާޅުވިއިރު، މާދަމާއިން ފެށިގެން ކޮވިޑް19 ގެ ނިއު ނޯމަލްގެ އާ މަރުހަލާއެއް ފަށާ ސްކޫލުތަށް ވެސް ހުޅުވަން ވަނީ ހަމަޖެހިފަ އެވެ.